Çfarë po bën Shqipëria për sigurimin e vaksinës? Ministrja Manastirliu: Kemi gati planin e vaksinimit
Çfarë po bën Shqipëria për sigurimin e vaksinës? E pyetur nga gazetarët, Ministrja e Shëndetësisë Ogerta Manastirliu tha se qeveria shqiptare po bën përpjekje që procesi i vaksinimit të nisë në muajt e parë të vitit të ardhshëm.
Ministrja përmendi faktin se Shqipëria është bërë pjesë e instrumentit global Covax që parashikon një shpërndarje të barabartë të vaksinës. Po ashtu, ajo tha se një përpjekje tjetër është ajo me Komisionin Europian si dhe përmes kontakteve direkte me kompanitë prodhuese.
“Jemi 100 % të angazhuar dhe po punojmë me Pfizer” tha ministrja por pa dhënë detaje të mëtejshme. Në përgjigjen e saj ministrja u ndal gjerësisht në shpjegimin e masave paraprake që Shqipëria po merr për t’iu përgjigjur planit të vaksinimit.
Ajo evidentoi se Shqipëria ka gati planin e vaksinimit dhe për infrastrukturën, në varësi të llojit të vaksinës që do të sigurohet.
Sa i përket prioritetit të vaksinimit, ministrja tha se veç punonjësve të shëndetësisë, do të vaksinohen ata që janë mbi moshën 75 vjeçare dhe ata që janë mbi 65 vjeç por me sëmundje kronike. Ndërkohë, në listën e prioritetit janë edhe punonjësit e shërbimeve kritike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.