Çmimi i ujit në Evropë – Analiza, Tirana me tarifat më të ulëta për abonentët

Tirana ka çmimin më të ulët të ujit, në krahasim me disa nga kryeqytetet e tjerë të Evropës. Aktualisht, qytetarët e Tiranës paguajnë 0.39 USD për m3, ndërkohë që sipas Statistikave Ndërkombëtare për Shërbimet e Ujit, që u prezantuan gjatë një konference të zhvilluar në mesin e muajit qershor në Palermo të Italisë, rezulton se kjo shifër është shumë larg tarifave që aplikohen në disa nga vendet e Bashkimit Evropian.

Sipas raportit, një ndër kryeqytetet me çmimin më të ulët të ujit është Roma, e cila aktualisht paguan 1.62 USD për m3, ndërsa pas saj renditet Oslo me 4.57 dollarë.

Qytetarët e Brukselit paguajnë 5.12 USD/ m3, ndërsa në Zyrih  5.96 USD/m3. Amsterdami dhe Kopenhageni janë 2 kryeqytete evropianë , të cilët paguajnë më shtrenjtë ujin, me 7 dhe 8 dollarë secili.

Ndërkaq, nëse i referohemi të dhënave të vendeve të rajonit, rezulton se në Zagreb qytetarët paguajnë 2.37 USD/m3, ndërsa në Podgoricë 0.69 USD, çka do të thotë se Tirana renditet ndër qytetet me çmimin më të ulët edhe në rajon.

Megjithatë ajo që vlen të theksohet është niveli i këtyre tarifave në raport  me Prodhimin e Brendshëm Bruto për frymë.

Sipas të dhënave të Fondit Monetar Ndërkombëtar Shqipëria renditet në vendin e 100-të, me 4.781 USD, ndërsa lihet pas nga Kroacia dhe Mali i Zi, të cilët renditen përkatësisht në vendin e 56-të dhe 82-të. Ndërkaq, sa i takon vendeve të tjerë të Bashkimit Evropian rezulton se Norvegjia mban vendin e dytë, me rreth 97 mijë dollarë, duke u ndjekur nga Zvicra, Danimarka dhe Hollanda.

Belgjika renditet në vendin e 17-të, me rreth 48 mijë dollar, ndërsa Italia mban vendin e 27, me rreth 36 mijë dollar.

Tirana është përfshirë nga debate i rritjes së çmimit të ujit,  duke propozuar një tarifë 20 lekë më të lartë për konsumatorët, duke e çuar çmimin nga 45 lekë/m3, në 65 lekë/ m3 apo 0.56 USD për m3.

Çmimi ujit sipas kryeqyteteve

Tirana 0.39 USD/ m³

Podgoricë 0.69 USD/ m³

Zagreb 2.37 USD/ m³

Roma 1.62 USD/ m³

Oslo 4.57 USD/ m³

Bruksel 5.12 USD/ m³

Zyrih 5.96 USD/ m³

Amsterdam 7 USD/ m³

Kopenhagen 8 USD/ m³

PBB PËR FRYMË

Norvegji 97.013 USD

Zvicër 87.475 USD

Danimarkë 60.564 USD

Holandë 51.373 USD

Belgjikë 47.722 USD

Itali 35.823 USD

Kroaci 13.494 USD

Mali i Zi 7.494 USD

Shqipëri 4.781 USD

BURIMI: FMN

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.