Dështon kampioni bankar gjerman – S’ka shkrirje mes Deutsche Bank dhe Commerzbank

Deutsche Bank dhe Commerzbank i dhanë fund bisedimeve për shkrirjen, duke ngritur dyshime mbi planet e tyre të ristrukturimit.

Dy bankat më të mëdha në Gjermani bënë të ditur se përpjekja për bashkimin e tyre do të ishte tejet e vështirë dhe theksuan gjithashtu kostot e mëdha të ristrukturimit dhe kërkesat shtesë për kapital. Dështimi i marrëveshjes detyron tashmë Deutsche Bank që të formojë një plan të pestë të ristrukturimit që prej vitit 2015 dhe të zbusë shqetësimet e investitorëve  dhe rrisë kthimin e aksionarëve.

Për Commerzbank, që zotërohet ende në 15% nga qeveria federale,  mund të ketë ndonjë plan alternativë nga jashtë, ndërkohë që ING dhe UniCredit kanë shprehur hapur interesin për ta blerë.   Aksionet e Deutsche u rritën me 3.2% në 7.8 euro, ndërsa Commerzbank ra me 2.3%. Huadhënësit kanë zhvilluar bisedime për shkrirje që prej muajit Mars, por janë përballur me kundërshti të madhe nga sindikatat dhe aksionarët kryesorë.

Deutsche Bank qëndron një nga bankat me rëndësi më të madhe sistemike në botë, ndërkohë që mban aktive prej mbi 1.5 trilionë dollarë. Shkrirja është nxitur edhe nga Qeveria, ndërkohë që Ministri i Financave Olaf Scholz, ka shprehur dëshirën për krijimin e një kampioni kombëtar të huadhënies.  Por, kundërshtia e madhe nga sindikatat  mbi humbjen e vendeve të punës, bëri që politikanët të largohen nga dëshira e Scholz.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.