Deutsche Bank planifikon shkurtime të vendeve të punës pas rënies së madhe të fitimeve

Deutsche Bank mori një tjetër goditje ditën e premte, pasi fitimet neto pësuan një rënie prej 79 për qind në tremujorin e parë. Të ardhurat neto prej 120 milionë eurosh ishin nën parashikimin prej 379 milionë, sipas një sondazhi të Reuters.

Banka njoftoi planet për të reduktuar ndjeshëm fuqinë e saj punëtorë gjatë pjesës tjetër të vitit 2018, veçanërisht në bankat e saj të korporatave dhe investimeve. Ajo gjithashtu synon të zvogëlojë veprimet në shitjen e obligacioneve dhe tregtimin e aksioneve, veçanërisht në Shtetet e Bashkuara dhe Azi. Sipas bankës, shkurtimet janë një lëvizje për t’u bërë më të fokusuar te klientët e saj.

Huadhënësi me qendër në Frankfurt është nën shqyrtim nga aksionarët për shkak të humbjeve të njëpasnjëshme gjatë këtyre tri viteve, duke përfshirë edhe atë të vitit 2017 prej 497 milionë euro.

Të ardhurat për tremujorin ishin ulur me 5 për qind në pjesën e parë të këtij viti në 7 miliardë euro, nën presionin e vlerësimit të euros kundrejt dollarit dhe të ardhurave më të ulëta të korporatave dhe investimeve, të cilat ranë 13 për qind nga viti në vit në 3.8 miliardë euro . Të ardhurat për të gjitha bizneset gjithashtu u evidentuan në rënie nga viti në vit.

Christian Sewing, shefi ekzekutiv i bankës, i emëruar kohët e fundit, theksoi nevojën për të përshtatur strategjinë e saj në disa fusha të biznesit, ndërsa cilësoi si të pashmangshëm reduktimin e punonjësve.

“Reduktimi i numrit të përgjithshëm të punonjësve është “i dhimbshëm, por për fat të keq është i pashmangshëm për të siguruar konkurrencën e bankës sonë në plan afatgjatë”, tha shefi i ri ekzekutiv Christian Sewing.

Më tej, Deutsche Bank tha se shkurtimet pritej të kenë një ndikim negativ tek të ardhura në vitin 2018, por shtoi se “do të përmirësojnë kthimet tona në një periudhë afatmesme”.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.