“Doors of Tomorrow”- Bashkëpunimi Itali-Shqipëri vjen në një ekspozitë
“Të rrëzojmë muret e së shkuarës, t’i hapim dyert zhvillimit”, ishte motoja e aktivitetit të zhvilluar nga Ambasada Italiane, për të promovuar bashkëpunimin ndër vite mes dy vendeve.
Ambasadori Italian, Alberto Kutillo, u shpreh gjatë aktivitetit “Doors of Tomorrow”, se të dy vendet kanë një histori të gjatë bashkëpunimi dhe rezultatet e arritura janë të shumta, që nga infrastrukturat e reja deri te zhvillimi i qëndrueshëm i bashkësive vendore, nga mbrojtja e të drejtave të njeriut deri te ruajtja e pasurisë mjedisore.
Aktivitetin e përshëndeti edhe zëvendëskryeministrja Mesi e cila ka vlerësuar bashkëpunimin në të gjitha fushat që nga ekonomia, mjedisi e kultura.
Një ekspozitë veprash origjinale do të jetë e hapur për herë të parë për publikun. Këto “Side Events” do të paraqesin rezultatet dhe perspektivat e ardhshme të Bashkëpunimit mes Italisë dhe Shqipërisë në tema si: Programi Italo – Shqiptar i Konvertimit të Borxhit, Arsimi, Zhvillimi Rural, Ekonomia Sociale, Formimi, Punësimi, Të Drejtat e Njeriut, Mbrojtja e Pasurisë Mjedisore dhe Turizmi i Qëndrueshëm.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.