Efekti i Covid-19 tek turizmi – Janar-maj, numri i vizitorëve të huaj ka rënë me 60%
Deri tani, epidemia e Covid-19 e ka ulur numrin e turistëve të huaj me 60% për këtë vit. Të dhënat e Instat tregojnë se për pesëmujorin e parë të vitit Shqipërinë e kanë vizituar vetëm 600 mijë shtetas të huaj, nga 1.5 milionë që kishte qenë numri i tyre në të njëjtën periudhë të vitit të kaluar. Turizmi hyrës pothuajse u stopua në mesin e muajit mars, me mbylljen e kufijve për shkak të përhapjes së epidemisë. Në vijim numri i vizitorëve të huaj ka qenë i papërfillshëm dhe për muajin maj në Shqipëri hynë më pak se 17 mijë shtetas të huaj.
Paralizimi i turizmit ka një efekt shumë të madh në ekonominë shqiptare dhe kjo është arsyeja kryesore pse pritet që Shqipëria të ketë një rënie ekonomike më të thellë se ekonomitë fqinje për vitin 2020. Të ardhurat e ekonomisë shqiptare nga turizmi vitin e kaluar arritën në afro 2.1 miliardë euro, shifra më e lartë e regjistruar ndonjëherë. Me gjithë rihapjen graduale të kufijve, pasiguria është ende shumë e lartë. Turizmi ndërkombëtar gjatë verës pritet të ketë përmasa mjaft të kufizuara, por prania e infeksionit e bën të vështirë kthimin e menjëhershëm drejt një fluksi normal të lëvizjeve për qëllime turizmi.
Megjithatë, shpresat e sipërmarrjeve turistike janë që efekti i pakësimit të turistëve të huaj do të balancohet pjesërisht nga rritja e numrit të shqiptarëve që do të zgjedhin t’i bëjnë pushimet në Shqipëri. Vitin e kaluar, shqiptarët shpenzuan rreth 1.6 miliardë euro për turizëm jashtë vendit.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.