Energjia, Shqipëria bën hapa para – Këshilli Botëror i Energjisë: Ndër 4 performuesit më të mirë në botë këtë vit

Shqipëria ka fituar 30 pozicione në renditjen globale të qëndrueshmërisë energjetike. Indeksi i publikuar çdo vit nga Këshilli Botëror i Energjisë e rendit vendin tonë të 43-tin në botë, ndër 108 ekonomi, ndërkohë që një vit më parë mbante vendin e 73-të, ndër 128 ekonomi. Pra, përmirësimi i ndjeshëm në renditje i atribuohet edhe eliminimit nga lista e 20 vendeve të marra në analizë.  “World Energy Trilemma Index” ka për qëllim të masë qëndrueshmërinë energjike të një shteti duke u bazuar në tre shtylla kryesore: sigurinë energjetike, barazinë dhe qëndrueshmërinë ambientale.

Ndryshe nga një vit më parë, Shqipëria duket se ka parakaluar të gjitha vendet e tjera të rajonit, dhe tashmë ngjitet në vendin e parë. Kosova mungon në renditje. Vendi ynë lë pas në renditje edhe disa vende të tjera europiane. Shqipëria merr bindshëm më shumë pikë në drejtim të qëndrueshmërisë ambientale dhe në atë të barazisë, ndërkohë që zhgënjen në drejtim të sigurisë energjetike. Ndërkohë, raporti nënvizon se, Shqipëria këtë vit është performuesi i 4-t më i mirë në glob në drejtim të qendrueshmërisë ambientale, menjëherë pas Zvicrës, Suedisë dhe Norvegjisë.

Në nivel global ndërkohë, Zvicra, Suedia dhe Danimarka kryesojnë listën e Këshillit Botëror të Energjisë. Nga krahu tjetër i tabelës kemi Kongon, Beninin dhe Nigeri. Siguria energjetike është një ndër treguesit më të rëndësishëm të një vendi, jo vetëm për shkak të nevojave në sektor, por sidomos pasi përkthehet në paqëndrueshmëri fiskale. Një sërë institucionesh ndërkombëtare, si FMN, Moody`s, Banka Botërore, etj kanë paralajmëruar Shqipërinë se një ndër rreziqet kryesore fiskale buron pikërisht nga paqëndrueshmëria energjetike, rrjedhojë e drejtpërdrejtë e varësisë së sektorit nga burimet hidrike, që në vetvete janë në varësi të kushteve meteorologjike.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.