Më pak raste me Covid-19 – Tendenca në rënie javën që lamë pas, 47% e rasteve të reja u shënuan në Tiranë
2047 raste të reja me COVID-19 u shënuan gjatë javës që lamë pas, sipas raportimit ditor të Ministrisë së Shëndetësisë, duke shënuar një rënie të lehtë në raport me një javë më parë, ku u regjistruan 2114 raste. Sipas të dhënave të përpunuara nga TV SCAN Tirana mbetet qyteti me numrin më të lartë të infektuarve të rinj gjatë periudhës 26 tetor-1 nëntor tetor me 970 raste apo 91 raste më pak se java paraardhëse.
Fieri dhe Durrësi janë 2 qytetet e tjerë që kanë regjistruar më shumë të infektuar të rinj gjatë javës që lamë pas me 144 dhe 125 raste. Ndërkohë që, pas tyre vijnë Korça me 65 raste, Shkodra me 64 raste, Vlora me 63 raste dhe Pogradeci me 51 raste të reja. Lushnja regjistroi 50 raste të reja, Elbasani 48 raste dhe Kavaja, me 42 raste, duke u pozicionuar në 10 qytetet me numrin më të lartë të të infektuarve të rinj.
Këto qytete zënë rreth 80% të të gjithë rasteve të regjistruar javën që shkoi, ndërkohë që 47% e rasteve të reja janë regjistruar vetëm në kryeqytet, që përbën dhe vatrën më të nxehtë në të gjithë vendin. Sipas raportimeve zyrtare raste të rinj me COVID-19 u regjistruan në total në 47 qytete, çka do të thotë se në 14 bashki të tjera, të paktën prej 1 jave nuk raportohen raste të infektuarish të rinj.
Në total, deri të dielën në të gjithë vendin numërohen 9438 qytetarët të infektuar aktivë, të cilët mund të infektojnë edhe persona të tjera. Kjo shifër që ka pësuar rritje në raport me një javë më parë ku numëroheshin 8026 qytetarë të infektuar me COVID-19.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.