Eurodeputetët kërkojnë ndalimin e ‘pasaportave të arta’ për të dëmtuar aleatët e Putin!

Ligjvënësit europianë po i bëjnë thirrje Komisionit Europian që të ndalojë të ashtuquajturat “pasaporta të arta” për të parandaluar oligarkët rusë të anashkalojnë sanksionet e vendosura pas pushtimit të Ukrainës.

Eurodeputetët do të votojnë nëse shitja e pasaportave të BE-së për qytetarët e vendeve të treta duhet të hiqet gradualisht deri në vitin 2025, së bashku me rregulloret e reja që duhet të vendosen për të bërë të pamundur përdorimin e shtetësisë së BE-së për t’iu shmangur sanksioneve.

Midis 2011 dhe 2019 industria e pasaportave të arta mblodhi mbi 20 miliardë euro për vendet anëtare të BE-së, përfshirë Maltën, Greqinë, Bullgarinë, Portugalinë dhe Qipron, me të paktën 130,000 njerëz që morën pjesë në skema.

Në një numër prej këtyre shteteve, shtetësia sigurohet në këmbim të investimeve të konsiderueshme në pronë. Eurodeputetja holandeze Sophie in ‘t Veld tha se rusët janë grupi më i madh i shtetasve të palëve të treta që kanë përfituar nga skema dhe se shumë janë afër regjimit të Putin.

Ajo tha se kishte raste në Maltë dhe Qipro ku informacioni i kërkuar nga autoritetet nuk ishte dhënë në mënyrë adekuate. Raporti do t’i shkojë Komisionit Europian i cili do të vlerësojë se si do të vazhdojë.

Eurodeputetët po kërkojnë gjithashtu një taksë nga çdo vend që përfiton nga lëshimi i pasaportave të arta dhe skemave të qëndrimit ku të ardhurat duhet të shkojnë drejt buxhetit të BE-së.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.