Fitch: Shqipëria në rrezik – Indeksi i riskut, ndër vendet më të rrezikuara në rajon
Bmi research, pjesë e agjencisë së vlerësimit Fitch, ka publikuar së fundmi një raport të posaçëm për ekonomitë europiane në zhvillim, mes të cilave edhe Shqipëria.
Ndryshe nga raportet e mëparshme, agjencia në raportin e fundit përfshin edhe një indeks risku për vendet e Europës Jug-lindore, ku i jep secilit shtet një pikëzim nga 0 në 100, si në terma afat-shkurtër ashtu edhe në terma afat-gjatë, në dy drejtime; politikë dhe ekonomi.
Shqipëria duket më e rrezikuar në afatshkurtër, ndërkohë që në afatgjatë situata duket më e sigurt. Edhe mes ekonomisë dhe politikës, ekonomia duket se është faktori më kërcënues.
Në krahasim me vendet e tjera të rajonit ndërkohë, Shqipëria, me një pikëzim të përgjithshëm në 53.5 pikë, lë pas në renditje vetëm Kosovën dhe Bosnje Hercegovinën.
Sa i përket politikës, dhe rrezikut që buron nga ajo, Shqipëria është e treta në Europë, duke lënë pas thuajse të gjithë fqinjët me radhë. Indeksi i riskut që i referohet ekonomisë ndërkohë, në terma afat-shkurtër, e rendit vendin tonë, të parafundit në rajon. Në thuajse të gjithë indikatorët, Shqipëria rezulton nën mesataren e rajonit. Dhe në të gjitha rastet, nën mesataren globale.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.