Fitimi i sistemit bankar – 11 mld lekë për 6-mujorin e parë 2018

Sistemi bankar regjistroi rezultat financiar në rritje gjatë tremujorit të dytë të vitit. Sipas të dhënave nga Banka e Shqipërisë, në fund të muajit qershor, fitimi progresiv i sistemit bankar kishte vlerën e 11 miliardë lekëve.

Fitimi i bankave është rritur me 2.3 herë krahasuar me tremujorin e parë. Ndërsa kundrejt gjysmës së parë të vitit të kaluar, fitimi ka pësuar një rënie të lehtë me 4%. Por, duke pasur parasysh se 2017 ishte një vit rekord për sa i takon fitimeve, duket se performanca financiare e sistemit bankar është mjaft e lartë edhe këtë vit.

Duhet nënvizuar se, sidoqoftë, fitimet ngelet shumë të përqendruara tek pak banka të mëdha, ndërsa për pjesën tjetër të bankave tregtare fitimet janë në vlera normale, ndërsa një pjesë e tyre janë edhe me humbje.

Përtej këtij fakti, duke analizuar strukturën e të ardhurave dhe shpenzimeve në zërat kryesorë, duket se edhe këtë vit faktori më përcaktues në ruajtjen e fitimeve të larta është përmirësimi i cilësisë së aktiveve të bankave.

Gjatë gjysmës së dytë të këtij viti sistemi bankar ka arritur të rimarrë afërsisht shtatë miliardë lekë nga provigjionet e llogaritura më parë për humbje të mundshme nga kreditë apo instrumentet e tjerë financiarë.

Kjo nënkupton një klasifikim me rrezik më të ulët për aktivet në fjalë. Këtë vit sistemi bankar ka arritur të ulë në mënyrë të qëndrueshme raportin e kredive me probleme pranë nivelit të 13%.

Sipas Bankës së Shqipërisë, në fund të qershorit, raporti i kredive me probleme ishte 13.27%, nga 15.58% që ishte ky tregues një vit më parë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.