[Foto] Si duket burgu i Reçit në Shkodër – Gjonaj: Do të ndikojë në uljen e mbipopullimit në sistemin e burgjeve

Është hapur ditën e sotme burgu i Reçit në qarkun e Shkodrës, një investim I financuar nga Bashkimi Europian dhe Qeveria shqiptare. E pranishme në hapjen e këtij institucioni, ministrja e Drejtësisë, Etilda Gjonaj tha se ai do të ndikojë në uljen e mbipopullimit në sistemin e burgjeve, duke shtuar se plotëson të gjitha kushtet sipas standardeve të BE-së.

“Ky institucion plotëson të gjitha kushtet sipas standardeve të BE, në lidhje me akomodimin, sistemet e ngrohjes, regjimin e aktiviteteve ditore, aktiviteteve sociale, kulturore, edukimit, atyre sportive etj”, tha Gjonaj.

Duke u ndalur te reforma e ndërmarrë në sistemin penitenciar, Gjonaj tha se është në drejtimin e duhur, ku sipas saj synimi kryesor është krijimi i një sistemi të sigurt dhe larg ndikimeve politike.

Po ashtu, ministrja u shpreh se po forcohen masat antikorrupsion brenda sistemit të burgjeve përmes forcimit të Shërbimit të Kontrollit të Brendshëm të Burgjeve.

“Një numër i lartë punonjësish të policisë së burgjeve janë kallëzuar penalisht kur janë adresuar raste të ankesave për korrupsion ashtu si dhe në rastet e hetimeve proaktive për mitmarrje dhe favorizim të të burgosurve. Jemi të vendosur për t’a pastruar sistemin nga elementët e korruptuar në të gjitha nivelet”, shtoi Gjonaj.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.