Fshirja e detyrimeve me kusht, Tatimet: Procedurat që duhet të ndjekin subjektet për të përfituar nga ligji i faljes
Tatimpaguesit mund të përfitojnë nga fshirja me kusht e detyrimeve nëse paguajnë detyrimin principal deri më 31/12/2017.
Kështu thuhet në një njoftim të Drejtorisë së Përgjithshme të Tatimeve, ku ndër të tjera shpjegohet procedura e përfitimit, mbështetur në ligjin e faljes.
“Në zbatim të ligjit “Për pagesën dhe fshirjen e pjesshme të detyrimeve tatimore, doganore, si dhe procedura e heqjes nga qarkullimi të mjeteve të transportit” dhe Udhëzimit të Ministrisë së Financave në zbatim të tij, për fshirjen me kusht të detyrimeve për periudhat Janar 2011-Dhjetor 2014, Drejtoria e Përgjithshme e Tatimeve sqaron se:
-Tatimpaguesit duhet të logohen në llogarinë e tyre e-filing.
-Në rubrikën “Kontabilitet” klikojnë në nën menunë “Urdhërpagesat”
Zgjedhin Urdhërpagesën përkatëse dhe e printojnë atë.
Më pas mund të drejtohen në çdo bankë të nivelit të dytë duke kryer pagesën vetëm për detyrimin principal për tatimin/taksën/tarifën/kontributin.
Sapo sistemi tatimor të njohë likujdimin e detyrimit, ekzekuton fshirjen e gjobës dhe kamatëvonesës lidhur me të. Për t’u njohur me llojet e detyrimeve të cilat përfitojnë nga fshirja me kusht vizitoni edhe faqen tonë zyrtare në rubrikën Legjislacioni/Akte 2017”, thuhet në njoftimin e DPT.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.