Furnizim 24 orë me ujë në Tiranë – Bashkia merr 80 milionë euro kredi, përfitojnë 800 mijë banorë
Bashkia e Tiranës do të marrë një kredi prej 80 milionë eurosh nga Banka Europiane e Investimeve me qëllim furnizimin dhe shpërndarjen me ujë në kryeqytet. Referuar kontratës mes dy palëve të depozituar për diskutim dhe miratim në komisionet parlamentare, projekti që do të implementohet përmes kësaj huaje, “Furnizimi dhe shpërndarja me ujë” për Tiranën (UKT) ka për qëllim të kontribuojë në përmirësimin e kushteve të jetesës së rreth 800 mijë banorëve , duke siguruar furnizim të sigurt dhe të vazhdueshëm me ujë të pijshëm.
Konkretisht synohet të mbyllen punimet e ndërtimit për realizimin tubacioneve të reja rreth 42 km, rindërtimi i afërsisht 10 km tubacione, sektorizimin e zonave të furnizimit të rretheve, duke përfshirë SCADA-n, rezervuarët e ujit, valvulat e reduktimit të presionit, njehsorët dhe pajisje të tjera të ngjashme.
Punimet përshijnë ndërtimin e një unaze të furnizimit me ujë me presion të lartë, duke përfshirë zonat me presion të lartë, i cili do të sigurojë furnizim me ujë 24 orë për më shumë se 90% të popullsisë në zonën e shërbimit, do të reduktojë konsumin e energjisë (për shkak të eliminimit të pompave të kushtueshme/joefikase të ujit) dhe do të përmirësojë cilësinë e ujit të pijshëm, duke eliminuar sistemin e rezervuarëve të vegjël individualë të ndërtuar mbi çati, që kanë rrezik të lartë të ndotjes së ujit.
Parashikohet gjithashtu zhvillimin i një burimi të ri natyror, Guri i Bardhë, që ndodhet 25 km në verilindje të Tiranës. Vlera totale e projektit është 144.5 milionë euro , nga të cilat 80 milionë euro janë hua nga Banka Europiane e Investimeve dhe pjesa tjetër e investimit janë fonde të Ujësjellës Kanalizime Tiranë.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.