Gazprom ndërpret furnizimin me gaz për Danimarkën dhe Gjermaninë!

Prodhuesi rus i gazit Gazprom njoftoi se ka ndërprerë furnizimin me gaz për Orsted të Danimarkës dhe Shell Energy për kontratën e tij për furnizimin me gaz në Gjermani, duke përmendur dështimin e kompanive për të kryer pagesat në rubla.

Gazprom tashmë ka ndërprerë furnizimet për tregtarin holandez të gazit GasTerra, si dhe për Bullgarinë, Poloninë dhe Finlandën pas refuzimit të tyre për të paguar gazin në rubla ruse, siç kërkoi Moska në përgjigje të sanksioneve perëndimore për konfliktin Rusi-Ukrainë.

Kompanitë gjermane, italiane dhe franceze, megjithatë, kanë thënë se do të angazhohen me skemën e pagesave të Moskës për të siguruar se mund të mbajnë furnizimet.

Bundesnetzagentur, rregullatori i rrjetit të Gjermanisë, tha të mërkurën se Shell Europe përbënte vetëm vëllime të vogla të furnizimit me gaz që mund të merreshin nga palët e tjera.

Fluksi i gazit natyror në Danimarkë përmes Gjermanisë mbeti i qëndrueshëm të mërkurën, treguan të dhënat nga operatori danez i sistemit Energinet.

Nuk ka asnjë tubacion gazi direkt nga Rusia në Danimarkë dhe blerësit danezë kanë mundësinë të blejnë nga burime të tjera përveç Gazprom, ka thënë Agjencia Daneze e Energjisë.

Furnizimi me gaz nëpërmjet Ukrainës, një rrugë kryesore e eksportit të Gazprom në Europë, vazhdoi në 41.2 milionë metra kub të mërkurën, pak më poshtë nga vëllimet e së martës. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.