Gjermania shpall “paralajmërim të hershëm” për krizë të mundshme të furnizimit me gaz rus!

Gjermania deklaroi të mërkurën një “paralajmërim të hershëm” për një emergjencë të mundshme të furnizimit me gaz, duke thënë se masa ishte krijuar për të përgatitur rrezikun e ndërprerjes ose ndalimit të rrjedhave të gazit natyror nga Rusia.

Njoftimi – shenja më e qartë ende se Bashkimi Europian po përgatitet për ndërprerje të furnizimit pas vendosjes së sanksioneve të paprecedentë pas pushtimit rus të Ukrainës – vjen pasi Moska planifikon të prezantojë një mekanizëm të ri duke e kthyer pagesën për gazin e saj në rubla.

Kjo kërkesë që është refuzuar nga vendet e G7, përfshirë Gjermaninë, dhe ngjalli frikën e ndërprerjeve. Sipas planit ekzistues të emergjencës së gazit të Gjermanisë, paralajmërimi i hershëm është i pari nga tre fazat dhe nuk nënkupton ende ndërhyrjen e shtetit për racionimin e gazit.

Por Ministri i Ekonomisë Robert Habeck u bëri thirrje konsumatorëve dhe kompanive të reduktojnë konsumin, duke thënë se “çdo kilovat orë ka rëndësi”. Ai tha në një konferencë shtypi se furnizimet me gaz janë të mbrojtura për momentin dhe se Gjermania po monitoron nga afër flukset e furnizimit me operatorët e tregut.

Rusia përbënte 55% të importeve të gazit të Gjermanisë në vitin 2021. Edhe pse kjo shifër ra në 40% në tremujorin e parë të 2022, Habeck ka thënë se Gjermania nuk do të arrijë pavarësinë e plotë nga furnizimet ruse përpara mesit të vitit 2024.

Ekipi i krizës, i cili përfshin anëtarë të ministrisë së tij, rregullatorit gjerman të rrjetit, operatorët e rrjetit dhe përfaqësues të 16 shteteve federale të Gjermanisë do të monitorojnë nga afër situatën “në mënyrë që – nëse është e nevojshme – të merren masa të mëtejshme për të rritur sigurinë e furnizimit”.

Kreu i rregullatorit gjerman të rrjetit Bundesnetzagentur, Klaus Mueller, në një postim në Twitter tha se qëllimi i paralajmërimit të hershëm ishte të shmangte një përkeqësim të furnizimit dhe u bëri thirrje konsumatorëve dhe industrisë që të përgatiten për “të gjithë skenarët”. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.