Hapet tregu i auditimit energjetik – Drejtori i Eficencës së Energjisë: Gati në prill, mundësi edhe për investitorët italianë

Deri në fillim të muajit prill do të certifikohen audituesit e parë të energjisë, duke zhbllokuar procesin e auditimit energjetik të ndërtesave”. Lajmi u bë me dije nga drejtori i Agjencisë së Eficencës së Energjisë, Evis Berberi,  gjatë mbledhjes së Dytë të Energjisë, të organizuar nga Ambasada Italiane dhe Dhoma e Tregtisë Italiane. Berberi tha se janë 9600 ndërtesa publike që do të auditohen nga pikëpamja energjetike e që më pas do të duhet të aplikohen parimet e eficencës së energjisë, duke hapur një treg të gjerë investimesh.

Agjencia e Eficencës së Energjisë nënshkroi edhe një memorandum bashkëpunimi me Qendrën e Shërbimeve Energjetike në Itali, e cila do të ofrojë asistencë teknike në këtë fushë. Ndërkohë që, zv. ministri i Infrastrukturës dhe Energjisë Ilir Bejtja ftoi investitorët italianë të investojnë në sektorin energjetik shqiptar, teksa premtoi përgjigje të shpejta dhe kushte të mira të të bërit biznes.

Qëllimi i takimit të organizuar në Tiranë është promovimi i  integrimit të tregjeve të energjisë, për të krijuar një treg rajonal të sigurt, efikas dhe të energjisë me tregun europian .

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.