Intervista në “France 24”, Rama: Pse Europa është rruga e vetme për Shqipërinë dhe Ballkanin
Integrimi i Shqipërisë në Bashkimin Europian shihet si rruga e vetme për të krijuar institucione të qëndrueshme dhe demokratike sipas kryeministrit Edi Rama. Në një intervistë të dhënë për televizionin “France 24”, Rama tha se vendet e rajonit ende kanë një shpresë për t’ju bashkuar Europës.
“Për ne Europa është ekzaktësisht projekti i paqes e sigurisë që ishte qysh në krijimin e BE-së, sepse ne i kemi njohur luftërat dhe sapo kemi dalë nga luftërat. Dhe nëse Ballkani sot nuk është siç thuhej gjithmonë një fuçi baruti për Europën kjo sepse ai ka sot një motivim dhe një shpresë më të madhe për t’ju bashkuar Europës. Sidoqoftë mund t’ju them se për ne nuk ka alternativë tjetër, integrimi në Europë nuk është një udhëtim për të shkuar diku, është rruga për të ndërtuar një shtet modern dhe një shoqëri demokratike”.
I pyetur për mungesën e dialogut me opozitën, Rama u shpreh se nuk ka asgjë dramatike dhe se ende ekziston mundësia për komunikim mes palëve.
“Unë mund t’ju them se jemi vetëm një demokraci e re dhe kemi ende për të mësuar dhe për të ngritur instrumente për një komunikimi normal midis njerëzve dhe partive politike, por asgjë dramatike”.
Kreu i qeverisë shqiptare u ndal edhe tek reforma në drejtësi, për të cilën foli për bojkotin e opozitës në komisionet e vettingut dhe rolin e ndërkombëtarëve në këtë proces.
“Në fakt është disi paradoksale. Rrallë ndodh që një qeveri të përcaktohet për një reformë radikale në drejtësi shumë të rëndësishme siç thatë dhe ju të lidhur me korrupsionin në nivele të larta dhe opozita të jetë kundër. Është një reformë që kemi nisur në harmoni me misionin e drejtësisë së Bashkimit Europian dhe atë të Shteteve të Bashkuara të Amerikës. Të mbështetur me shumë ekspertë dhe eksperienca në gjirin e BE-së për reforma të tilla në vende të tjera që kanë dalë nga komunizmi”.
Intervista e Ramës për televizionin francez vjen dy ditë pasi u vlerësua nga presidenti i Francës me titullin e lartë të Komandantit të Urdhrit të Legjionit të Nderit.
Florenc Drizari/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.