Investimet në Korçë – Rama: Projektet që do të zbatohen gjatë periudhës 2018-2020

Turizmi, bujqësia dhe industria përpunuese janë edhe tre prioritetet kryesore të qeverise për kryerjen e investimeve në qarkun e Korçës. Deklarata ka ardhur nga kryeministri Edi Rama, në një konferencë për shtyp pas mbledhjes së qeverisë.

Rama ka bërë edhe një pasqyrë të investimeve aktuale dhe atyre që do të kryhen në këtë qark gjatë periudhës 2018 – 2020. Duke u ndalur te investimi i gazit, Rama tha se termocentrali që do të ndërtohet në Korçë do të ndikojë në rritjen e punësimit.

“Në këtë qark ne synojmë të realizojmë brenda vitit 2021 përfundimin  punimeve për investimin e gazit, një termocentral që do të ngrohet dhe do të furnizohet me gaz përmes TAP, që do të rrisë punësimin dhe me projektin energjisë së nënstacionit Zëmblak”, u shpreh Rama, duke shtuar se ky i fundit do të reduktojë edhe fluksin që vjen nga linjat e largëta.

Lidhur me infrastrukturën rrugore, sipas kryeministrit është drejt përfundimit segmenti Qafë Thanë-Lin-Pogradec, ndërsa po punohet edhe për aksin rrugor Qukës-Qafë Plloçë. Po ashtu, shtoi më tej se do të kryhen ndërhyrje rehabilituese në një sërë segmentesh rrugore për të lehtësuar lëvizshmërinë brenda qarkut.

Ndërkohë, në vijimësi të prezantimit të projekteve që do të zbatohen në Korçë, Rama tha se një tjetër prioritet i qeverisë është zgjatja e linjës hekurudhore, një zgjatim i rrugës Lin-Pogradec me Maqedoninë.

Ndërsa, duke u ndalur te parku olimpik i Korçës, që është drejt përfundimit, Rama tha se do të rrisë fuqinë tërheqëse të Korçës turistike.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.