Investimet në spitalet rajonale, Manastirliu: 1.2 mln euro për aparatura biomjekësore

Do të vijojnë investimet në spitalin rajonal të Elbasanit. Sipas Ministres së Shëndetësisë dhe të Mbrojtjes Sociale Ogerta Manastirliu në këtë spital do të shtohen aparatura te reja mjekësore më vlerë financiare 1.2 milionë euro.

“Ish-Kirurgjia e spitalit te Elbasanit me investimin e këtij viti me vlere 165 milionë lekë do të shndërrohet në një urgjencë multifunksionale si dhe do të përfshijë shërbimin e kardiologjisë dhe neurologjisë. Investimeve në këtë spital i shtohet një gamë e gjerë dhe shumë e rëndësishme aparaturash biomjekësore moderne në 6-mujorin e parë të këtij viti, duke filluar nga rezonanca magnetike, grafia e lëvizshme, eko, inkubatorë etj, me vlerë rreth 1.2 milion euro”, u shpreh Ministrja Manastirliu.

Ndërkohë që brenda vitit nis rikonstruksioni i poliklinikës së Përrenjasit, e cila i shërben 40 mijë banorëve të kësaj zone.

“Për ne si Ministri dhe për Qeverinë shqiptare është parësore ndërhyrja në infrastrukturën e qendrave të kujdesit shëndetësor për të garanatuar shërbim cilësor sa më pranë komunitetit. Besojmë se brenda vitit nis rikonstruksioni i plotë i kësaj poliklinike në bashkëpunim me partnerët tanë ndërkombëtarë”, tha Ministrja Manastirliu.

Një tjetër program i rëndësishëm që Ministria e Shëndetësisë dhe Mbrojtjes Sociale ka nisur të zbatojë në të gjithë Shqipërinë është ai I kujdesit shëndetësor në komunitet.

Manastirliu ndoqi nga afër procesin e vaksinimit dhe mamografive falas për komunitetin romë në lagjen 5 Maji në Elbasan. Në këtë qark do të rikonstruktohen brenda vitit 2018 edhe 6 qendra shëndetësore, 4 prej të cilave në Elbasan dhe 2 në Librazhd, në kuadër të programit kombëtar të rikonstruksionit këtë vit të 80 qendrave shëndetësore në të gjithë vendin.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.