iPhone 8-ta do të ketë një çmim të “kripur” – Ja sa do të ndryshojë çmimi i tij krahasuar me telefonat paraardhës
Një drejtues i lartë i Foxconn, Luo Zhongsheng tha se kostot e larta të prodhimit të telefonit të ri i cili pritet të sjellë një ndryshim radikal të dizajnit bëjnë që çmimi i iPhone 8 të jetë mjaft i lartë.
Është kostoja e ekranit OLED i cili do të kontribuojë në çmimin e kripur të telefonit. Sipas spekulimeve që kanë shoqëruar telefonin që nga pranvera, raportohet se iPhone 8 do të ketë një ekran me skaje jashtëzakonisht të holla me një hapësirë në krye të dedikuar kamerës dhe sensorëve.
Ndërsa kjo risi mundëson një ekran më të madh, gjithashtu mund të jetë e vështirë për tu prodhuar në sasi të mëdha, raporton PcWorld.
E thënë ndryshe pritet që telefoni të kushtojë mes 1,200 deri në 1,400 dollar, duke e bërë goxha të shtrenjtë krahasuar me paraardhësit.
Modeli më i shtrenjtë i iPhone 7 kushtonte 969 dollar kur doli në shitje vitin e kaluar. Modeli i këtij viti pritet të sjellë funksionalitete të veçanta si ngarkim wireless dhe teknologji të njohjes së fytyrës.
Shumica e funksionaliteteve të reja janë konfirmuar edhe nga vetë Apple në firmwaren e HomePod.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.