KLSH “godet” koncesionet – PPP-të pa monitorim, papërgjegjshmëri dhe mungesë kapacitetesh

Kritikave të forta të ndërkombëtare ndaj kontratave të Partneritetit Publik Privat, i është bashkuar edhe institucioni suprem i auditimit të financave publike në vend. Në analizën që i bën kontratave koncesionale për vitin 2017, Kontrolli i Lartë i Shtetit arrin në përfundimin se ato janë në masë të madhe të pamonitoruara dhe se dëshmojnë papërgjegjshmëri dhe mungesë kapacitetesh nga sektori publik për lidhjen dhe administrimin e tyre.

Problematikë kryesore mbetet mungesa e mbikëqyrjes nga ana e institucioneve të zbatimit të kontratave koncesionare, të cilat jo rrallë shkaktojnë efekte financiare negative.

“Gjatë auditimeve të planifikuara përgjatë vitit 2017, janë konstatuar problematika në lidhjen dhe mbikëqyrjen e këtyre marrëveshjeve koncesionare. Në disa raste këto problematika kanë rezultuar edhe me efekte financiare”, thekson në analizë Kontrolli i Lartë i Shtetit.

Sipas Kontrollit të Lartë të Shtetit, problematik mbetet edhe fakti se, këto institucione edhe pas kaq shumë vitesh që vazhdojnë të përdoren këto tipe kontratash nuk kanë një databazë në lidhje me të gjitha kontratat koncensionare që administrojnë, duke e bërë të vështirë gjurmimin e tyre në vite, ndjekjen e investimeve që pritet të kryhen në çdo fazë nga ana e koncensionarëve apo të ardhurat e që pritet të arkëtohen në varësi të aktiviteti nga ana e njësive administruese të këtyre kontratave koncensionare.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.