Komiteti i Përbashkët Doganor – Shqipëri-Turqi, 500 mln USD shkëmbime tregtare nuk janë të mjaftueshme!
Shkëmbimet tregtare mes Shqipërisë dhe Turqisë janë rreth 500 milionë dollarë. Shifër kjo që nuk është e mjaftueshme për ekonominë e të dy vendeve sipas atasheut tregtar turk Halis Kaya.
“Mes Shqipërisë dhe Turqisë kemi një vlerë shkëmbimi tregtar rreth 500 milionë dollarë, por ne normalisht këtë vlerë e shikojmë si shumë të vogël dhe të pamjaftueshme. Do të na duhet të rrisim shkëmbimet tregtare në mënyrë që të ndihmojmë dy vendet për ekonomitë e tyre”, tha Kaya.
Shkëmbimet doganore mes dy vendeve shpesh herë kanë problem sa i takon deklarimit të vlerës së mallrave apo sasisë së tyre. Sipas Kaya po punohet që këto problematika të sheshohen. Ndërkohë që dëshira e palës turke është që të dy vendet tona të shihen si vende transit për të nxitur më shumë zhvillimin ekonomik në vendet respektive.
“Problemet të cilat kanë të bëjnë me deklarimin e vlerës së mallrave, me deklarimin e sasisë së mallrave, herë herë autoritetet shqiptare na vënë në dijeni, herë herë na bëjnë kërkesa për ridimensionimin e çmimeve edhe ne i përgjigjemi në kuadër të dy institucioneve që kemi ndërtuar mes vendeve tona. Normalisht që një arsye e vizitës time sot në Shqipëri është bisedimi për rritjen e këtij bashkëpunimi, rritjen e shkëmbimeve tregtare mes vendeve tona, por edhe në një temë tjetër për zhvillimin e mundësisë së përdorimit të dy vendeve tona si dy vende tranzite, pasi siç e dini edhe Shqipëria edhe Turqia janë dy vende kyçe për tranzitin e mallrave”, u shpreh Kaya.
Dhoma e Tregtisë dhe Indistrisë Turke ka zhvilluar një mëngjes pune me të gjithë anëtarët e saj për të diskutuar problematikat me të cilat ndeshen në sistemin doganor. Më pas të gjitha këto problematika do të diskutohen në Komitetin e Përbashkët Doganor Shqipëri-Turqi, i cili zhvillohet për herë të parë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.