Konkurrenca “shfajësohet” për çmimin e bukës – Biba: Nuk gjobitëm kompanitë për mungesë provash. Tregu është ende në hetim
Autoriteti i Konkurrencës ka dhënë llogari kundrejt deputetëve të Komisionit të Ekonomisë se përse nuk janë ndëshkuar kompanitë e importit dhe prodhimit të miellit për rritjen e çmimit të bukës dhe nënprodukteve të saj në vend.
Kryetari i Komisionit të këtij autoriteti ka theksuar se vetëm rritja e çmimeve nuk mjaftonte për të marrë një vendim me gjobë, pa pasur një raport të qartë mbi kostot që kanë pasur kompanitë, rritjen e çmimit të grurit dhe të tjera elementë. Sipas tij hetimi për këtë treg është ende në funksion.
Ndërsa deputetja demokrate Jorida Tabaku ka kërkuar të dijë se përse anëtarët e Komisionit të Konkurrencës kanë ndryshuar qëndrim, duke qenë se kanë pranuar se ka pasur një bashkërendim të çmimeve. Por sipas përfaqësuesve të Autoritetit të Konkurrencës, tregjet ndryshuan për shkak të rritjes së çmimeve të grurit në vendet e origjinës.
Pak muaj më parë konsumatorët u përballen me rritje të çmimit të bukës dhe nënprodukteve të tjera. Për të hedhur dritë mbi hetimin dhe vendimmarrjen e Autoritetit të Konkurrencës mbi këtë çështje Partia Demokratike kërkoi seancë dëgjimore me përfaqësuesit e këtij institucioni.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.