Konsulenca për gjurmimin e parave/ Kontrata e 2 ministrive, 375 mijë euro me kompaninë ndërkombëtare të auditit
127 milionë lekë, apo afërsisht 1.2 milionë dollarë janë përdorur nga fondi rezervë i qeverisë vitin e shkuar për të shlyer dy kontrata të sigluara nga ana e Këshillit të Ministrave. Të dyja kontratat janë zbardhur nga Kontrolli i Lartë i Shtetit.
Konkretisht bëhet fjalë për VKM-në nr.308, datë 23.05.2018 për Ministrinë Financave dhe Ekonomisë, në vlerë 47.25 milionë lekë (375,013 euro) “Për autorizimin e Ministrisë së Brendshme dhe MFE për lidhjen e kontratës me kompaninë “Erns & Young”, për të afruar konsulencë në zbatim të planit të veprimit “Për luftën kundër krimit ekonomiko-financiar dhe korrupsionit “në gjurmët e parasë”.
Kjo e fundit është një kompani shumëkombëshme me qendër në Britaninë e Madhe e specializuar në konsulencë dhe shërbime financiare.
Gjithashtu është publikuar dhe një kontratë tjetër VKM nr.115, datë 23.02.2018 për Ministrinë për Evropën dhe Punët e Jashtme, në vlerë 80.40 milionë lekë (720,000 euro) “Për autorizimin e MPJ për lidhjen e kontratës ndërmjet shtetit shqiptar dhe kompanisë “Apco Worldwide”.
Kjo kontratë kishte si qëllim parësor këshillimin dhe promovimin e objektivave të Ministrisë së Jashtme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.