Kredia në Kuvend/ 8 milion euro nga BEI për lumin e Lanës. Parashikohen dy ura të reja
Këshilli i Ministrave ka depozituar në Kuvend për ratifikim kredinë që qeveria shqiptare ka marrë nga Banka Europiane e Investimeve për rehabilitimin e lumit Lana në Tiranë. Marrëveshja e nënshkruar parashikon një kredi prej 8 milionë euro dhe një grant 2.4 milion euro. Kredia e ofruar nga BEI ka një afat maturimi 20 vjeçar, duke përfshirë një periudhë pa pagesë principali prej 4 vitesh.
Nëpërmjet këtij financimi synohet të realizohet zgjatimi i bulevardit nga Ura Teknologjike (ku përfundon aktualisht segmenti ekzistues) deri në kryqëzimin me rrugën “Teodor Keko” dhe rehabilitimin e shtratit të lumit Lana po për këtë segment.
“Rehabilitimi i lumit Lana në këtë segment dhe ndërtimi i zgjatimit të dy bulevardeve ‘Bajram Curri’ dhe ‘Gjergj Fishta’ do të ndikojnë pozitivisht në zhvillimin e kësaj zone, duke siguruar një infrastrukturë të qëndrueshme, e cila do t’i shërbejë edhe zonave përreth saj, duke përmirësuar gjendjen tejet të amortizuar të infrastrukturës ekzistuese” shkruhet në relacionin e projektligjit.
Projekti “Shtrati i Lumit Lana- Zhvillim Urban” pritet të zbatohet nga Bashkia Tiranë në shkurt të vitit 2022.
Nëpërmjet projektit “Vazhdimi i bulevardit “Gjergj Fishta” dhe “Bajram Curri” dhe rehabilitimi i lumit të Lanës nga Ura Teknologjike deri te kryqëzimi me rrugën “Teodor Keko” synohet të mundësohet krijimi i një shtrati me regjim hidraulik efiçent për të eliminuar problematikën e përmbytjeve në këtë zonë, si dhe duke krijuar hapësirat e nevojshme të zhvillimit urban të zonës.
Gjithashtu, parashikohet të zgjaten bulevardet paralel me lumin me të gjithë infrastrukturën e nevojshme si sinjalistikën, disiplinimin e ujërave të bardha dhe të ndotura, ndriçimin, telekomunikacionin, peizazhin si dhe lidhjen me infrastrukturën ekzistuese. Nga ana tjetër, projekti parashikon edhe 2 ura mbi shtratin e ri të lumit për nevojat e zhvillimit urban.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.