Kredia për ekonominë – Gjallërohet biznesi, në rritje për tre muaj radhazi
Kreditimi u rrit për të tretin muaj radhazi në shtator, duke konfirmuar sinjalet e një përmirësimi të ngadaltë. Sipas të dhënave nga Banka e Shqipërisë, totali i kredisë arriti në 553.4 miliardë lekë, afro katër miliardë lekë më shumë krahasuar me gushtin.
Për herë të parë që nga muaji mars, kreditimi është kthyer rritjes vjetore pozitive, ndonëse rritja është ende në përmasa modeste, me 0.7%. Në tre muajt e fundit, portofoli i kredisë kredisë për ekonominë është rritur me 10 miliardë lekë ose afro 75 milionë euro. Zhvillim përcaktues në muajt e fundit ka qenë përmirësimi i kredisë për biznesin. Statistikat tregojnë se për shtatorin kredia për sipërmarrjet u rrit me tre miliardë lekë, ndërsa për tre muajt e fundit rritja është mbi gjashtë miliardë lekë.
Kredia për biznesin përbën mbi 60% të totalit të kredisë për ekonominë, ndaj gjallërimi i saj ngelet vendimtar për tendencat e huadhënies në ekonomi. Sidoqoftë, segmenti më i shëndetshëm ngelet kreditimi i individëve, që vijoi rritjen për të shtatin muaj radhazi.
Vlera totale e kredisë dhënë individëve nga bankat dhe institucionet e tjera financiar ka arritur në afro 176 miliardë lekë, në rritje me afro 5% krahasuar me të njëjtën periudhë të një viti më parë. Të dhënat tregojnë se gjysma e dytë e vitit ka nisur me një gjallërim të huamarrjes, çka shton optimizmin për një përmirësim të mëtejshëm gjatë muajve të ardhshëm.
Rritja më e lartë ekonomike po e gjallëron kërkesën e tregut për financime, ndërsa ulja graduale e raportit të kredive me probleme pritet ta çlirojë më shumë ofertën e bankave.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.