Kursim-krediti u zgjerua me 6.2% gjatë 2020-ës – Pandemia ngadalëson hapin e rritjes, huaja rritet me 6.6%
Shoqëritë e kursim-kreditit kanë vijuar të zgjerohen edhe përgjatë tremujorit të katërt vitit të kaluar. Të dhënat më të fundit të Bankës së Shqipërisë tregojnë se aktivet e këtyre shoqërive kanë prekur shifrën rekord historike prej 11.93 mld lekësh, ose rreth 9.6 mln euro, nga rreth 11.23 mld lekë që ishin në tremujorin e katërt të vitit paraardhës, para se pandemia të godiste ekonominë. Në terma vjetorë, rritja e aktiveve fiksohet në masën 6.2%.
Vitin e paraardhës ndërkohë, rritja fiksohej në rreth 16%, çka sinjalizon se pandemia ka dhënë një lloj efekti. Aktualisht, në Shqipëri operojnë 14 shoqëri kursim-krediti dhe 1 union. Kredia zë pjesën kryesore të portofolit të aktiveve të shoqërive të kursim kreditit, me afro 8.5 mld lekë, ose rreth 71% e totalit. Krahasuar me të njëjtën periudhë të një viti më parë, rritja e huadhënies ndaj anëtarëve të shoqërive fiksohet në masën 6.6%, sinjalizojnë të dhënat e Bankës së Shqipërisë për tremujorin e 4-t të vitit të kaluar.
Pavarësisht rritjes, ky sektor zë pak më shumë se 1% të totalit të kredisë së sektorit bankar në vendin tonë. Shoqëritë e kursim kreditit janë të rëndësishme kryesisht për të financuar fermerët apo bizneset e vogla, veçanërisht në zonat rurale.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.