Leku i “heq” 5 mld lekë buxhetit – Ndryshimet, Ahmetaj: Morëm fonde aty ku nuk kishte performancë

5 miliardë lekë i ka kushtuar buxhetit të shtetit mbiçmimi i lekut  në 8 muajt e këtij vitit. Shifra është bërë  e ditur nga Ministri i Financave dhe Ekonomisë, Arben Ahmetaj në mbledhjen e pare për ketë sesion të ri të Komisionit Parlamentar përgjegjës, ku u diskutua akti normativ për ndryshimin e buxhetit, i miratuar në muajin Korrik. Ministri Ahmetaj ka sqaruar se disa zëra të buxhetit kanë ndryshuar për shkak të performancës së dobët të disa institucioneve, si Ministria e Bujqësisë, Infrastrukturës, Vettingut, etj dhe ato para kanë shkuar aty ka më shumë nevojë.

Sa i përket turizmit, Ministri Ahmetaj theksoi se formalizimi gjatë kësaj periudhe ka arritur e në shifrën e  5.6 miliardë lekëve, ndërsa theksoi se janë rritur ndjeshëm të ardhurat nga kontributet si pasojë e aksionit antiinformalitet.

Ministrit të Financave, iu kërkua llogari nga deputetët e mazhorancës  lidhur me koncesionet, ku bëri me dije se detyrimet për këtë zë në 7 muaj të vitit llogariten në vlerën e 5.1 miliardë lekëve.  Ndërkaq, deputetët e opozitës, bojkotuan  mbledhjen  e Komisionit të Ekonomisë dhe Financave. Ndërkohë, përmes një statusi në “Facebook”, deputetja demokrate Jorida Tabaku ka reaguar duke thënë se e vetmja arritje e qeverisë lidhet me rënien e kredisë për biznese dhe rritjen e lejeve të ndërtimit. Sipas saj mbivlerësimi i lekut është fallco, pasi leku është në zhdukje dhe qytetarët po konsumojnë më pak. Sipas saj, arsyeja që qeveria po e rishikon buxhetin lidhet me mosrealizimet e taksave.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.