Ligji për ndihmën juridike botohet në fletoren zyrtare – Nis nga veprimi më 1 Qershor 2018. Kush mund të përfitojë

Është botuar në fletoren zyrtare, ligji për ndihmën juridike të garantuar nga shteti, miratuar në Kuvend më datë 14 Dhjetor 2017. Ligji do të hyjë në fuqi nga 1 Qershori i këtij viti, çka do të thotë se nga kjo datë do të fillojnë të aplikohen falas shërbimet e ndihmës juridike.

Kjo ndihmë do të vijë në tre forma:

1. ndihmë juridike parësore – (informimi, këshillimi, përfaqësimi përpara organeve administrative)
2. ndihmë juridike dytësore – (përpilimi i akteve të nevojshme për të vënë në lëvizje gjykatën, këshillimi, përfaqësimi dhe mbrojtja para gjykatës)
3. përjashtim nga pagimi i tarifave gjyqësore dhe shpenzimeve gjyqësore dhe përjashtim nga detyrimi për të parapaguar tarifën e vënies në ekzekutim të urdhrit të ekzekutimit.

Përfituesit e ndihmës juridike klasifikohen në dy kategori: sipas të ardhurave të pamjaftueshme dhe kategoritë e veçanta që e kanë të drejtën pavarësisht të ardhurave.

Këtu përfshihen: viktimat e dhunës në familje, viktimat e trafikut të qenieve njerëzore dhe të abuzimit seksual, viktimat e mitur dhe të miturit në konflikt me ligjin, fëmijët që jetojnë në institucionet e përkujdesjes shoqërore, fëmijët nën kujdestari që kërkojnë të nisin një proces pa miratimin e kujdestarit të tyre, personat që përfitojnë pagesa për aftësinë e kufizuar, përfituesit e skemave të mbrojtjes sociale, personat që u nënshtrohen trajtimit në institucionet e shërbimit të shëndetit mendor, etj.

Ndërsa sipas të ardhurave dhe pasurisë, kanë të drejtë të përfitojnë nga ndihma juridike kategoritë e mëposhtme:

1. çdokush që provon se ka të ardhura dhe pasuri të pamjaftueshme për të përballuar shpenzimet e çështjeve gjyqësore
2. personat që jetojnë në familje dhe që të ardhurat e përbashkëta të përpjesëtuara sipas anëtarëve janë më të ulëta se 50% e pagës minimale mujore
3. personat që nuk jetojnë në familje që kanë të ardhura më të ulëta se paga minimale mujore
4. personat, pasuria e të cilëve nuk e tejkalon vlerën e 36 pagave minimale mujore

Duke nisur nga 1 Qershori, përgjegjës për dhënien e ndihmës juridike parësore do të jenë punonjësit me trajtim të posaçëm, organizatat jofitimprurëse të autorizuara dhe klinikat ligjore pranë institucioneve të arsimit të lartë. Ndërsa ndihma juridike dytësore, do të jepet nga avokatët që do të përfshihen në listën e Dhomës Kombëtare të Avokatisë.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.