Magjistratët e qershorit s’emërohen dot! Nisma në Kuvend: Emërimet të bëhet nga Prokurori e KLD. Në tetor 25 pranime, vitin tjetër 50
Për shkak të moskonstituimit të institucioneve të qeverisjes së sistemit të drejtësisë, në veçanti të Këshillit të Lartë Gjyqësor dhe Këshillit të Lartë të Prokurorisë, Shkolla e Magjistraturës aktualisht ndodhet në pamundësinë e organizimit të provimit të pranimit për kandidatët për magjistratë, por edhe të mosemërimit të kandidatëve për magjistratë, që diplomohen në muajin qershor të vitit 2018.
Kjo evidentohet në relacionin e nismës së depozituar në Kuvend nga dy deputetë të mazhorancës, Ulsi Manja e Klotilda Ferhati, që kanë propozuar edhe amendamentet për zgjidhjen e ngërçit, raporton portali SCAN.
“Për shkak të kohës që do të nevojitej për ngritjen e Këshillave dhe me qëllimin për të mos penguar zhvillimin normal të veprimtarisë së Shkollës së Magjistraturës, Kuvendi e ka rregulluar me ligj, si organizimin e provimit, ashtu edhe numrin e kandidatëve fitues, të ndarë, sipas profilit gjyqtar e prokuror, për vitin akademik 2016-2017 dhe 2017-2018. Konkretisht, me ligjin nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë” (neni 68, pika 2), si dhe me ligjin nr. 115/2016, “Për organet e qeverisjes së sistemit të drejtësisë” (neni 285), është ngarkuar Shkolla e Magjistraturës që të organizojë konkursin “për pranimin e 25 kandidatëve për magjistratë, respektivisht për vitin akademik 2016-2017 dhe 2017-2018”. Tashmë këto dispozita kalimtare e kanë kryer efektin e tyre ligjor për dy vite akademike dhe nuk ndihmojnë në zgjidhjen e çështjes për këtë vit akademik” shkruhet ne relacion.
Në rrethana të tilla, deputetët propozues evidentojnë se e vetmja zgjidhje është marrja e iniciativës ligjore për të bërë një shtesë në ligjin nr. 96/2016, që të ngarkojë Shkollën e Magjistraturës të organizojë jo më vonë se muaji tetor, konkursin për pranimin e 25 kandidatëve për magjistratë për vitin akademik 2018-2019 dhe të dyfishit të këtij numri për vitin akademik 2019-2020. Ndarja e profilit si gjyqtar dhe prokuror për kandidatët fitues për çdo vit akademik do të jetë përkatësisht 3/5 gjyqtarë dhe 2/5 prokurorë dhe do të përcaktohet nga Këshilli Drejtues i Shkollës së Magjistraturës, sipas renditjes përfundimtare.
Gjithashtu, Shkolla e Magjistraturës do të diplomojë në muajin qershor të vitit 2018 brezin e kandidatëve magjistratë, të pranuar në Programin e Formimit Fillestar në vitin akademik 2015-2016.
“Në këto kushte, kur Këshillat nuk janë krijuar ende dhe kandidatët që do të diplomohen në vitin 2018 nuk mund të emërohen dhe as të caktohen në pozicion, vlerësohet se e vetmja zgjidhje është marrja e iniciativës legjislative për të bërë një ndryshim në një prej dispozitave ligjore të ligjit nr. 96/2016, në mënyrë që të lejojë Këshillin e Lartë të Drejtësisë dhe Prokurorin e Përgjithshëm të emërojë dhe caktojë në pozicione kandidatët magjistratë të diplomuar, deri në krijimin e Këshillit të Lartë Gjyqësor dhe Këshillit të Lartë të Prokurorisë” shkruhet në relacion.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.