Firmat që bëjnë biznes në Iran – Gjermania do të mbrojë kompanitë e veta nga sanksionet amerikane
Ministri gjerman i Ekonomisë, Peter Altmaier, tha se vendi është gati që të mbështesë firmat e veta për të bërë biznes në Iran. Tërheqja e Shteteve të Bashkuara nga pakti bërthamor i vitit 2015 dhe rivendosja e sanksioneve kundër Iranit, kërcënoi gjithashtu me gjobë firmat e huaja që bëjnë biznes atje.
Gjermania, Franca dhe Britania, kanë bërë të ditur se do të qëndrojnë të angazhuara ndaj marrëveshjes bërthamore dhe ministri gjerman i Ekonomisë tha se Qeveria nuk sheh ndonjë arsye për të ndryshuar skemën e garancisë së eksporteve për Iranin.
“Jemi gati që të bisedojmë me kompanitë mbi mundësitë që kemi për të minimizuar pasojat negative”, tha ai. Thuajse 120 firma gjermane ndërmarrin operacione me stafin e tyre në Iran, përfshirë këtu Siemens, ndërsa 10,000 kompani të tjera kryejnë tregti me Iranin. Vitin e kaluar, eksportet e mallrave gjermane në Iran u rritën me rreth 400 milionë euro në 3 miliardë në total.
Megjithatë, ambasadori amerikan në Berlin, Richard Grenell, tha se firmat duhet të konsiderojnë etikën e të bërit biznes me Iranin, ku ekonomia kontrollohet kryesisht nga urdhëri fetar.
“Çdo vend ka sovranitetin e vet dhe mund të vendosë mbi sanksionet. Por, Gjermania, Franca dhe Britania, kanë thënë vetë se Irani përbën një kërcënim”, tha ai. Kancelarja Gjermane, Angela Merkel i tha presidentit iranian Hassan Rouhani në një telefonatë, se ajo mbështet ruajtjen e paktit bërthamor për sa kohë që Teherani respekton pjesën e rënë dakord. Presidenti Francez, Emmanuel Macon tha të njëjtën gjë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.