Ministrat e Financave në Luksemburg – Diskutojnë transformimin e ESM për largimin e FMN nga krizat
Ministrat e Financave të Eurozonës diskutuan gjatë takimit në Bruksel për rolin e fondit të shpëtimit të Eurozonës, duke thënë që fondi të qëndrojë i zotëruar nga qeveritë, të luajë një rol parandalues për krizat dhe të kthehet në një mbështetës për fondin e shpëtimit për bankat (SRF).
Ministrat janë drejtuesit e Mekanizmit Europian të Stabilitetit, të krijuar në kulmin e krisës së borxhit të Eurozonës dhe që ka një kapacitet prej 500 miliardë euro.
“Të gjithë ranë dakord se mekanizmi ka një rol të rëndësishëm për të luajtur jo vetëm në manaxhimin e krizave por edhe në parandalimin e tyre”, tha kreu i eurogrupit, Jeoren Djisselbloem. Roli parandalues për ESM, mund të sjellë një përplasje me Komisionin, që nën ligjin e Bashkimit Europian ka fuqinë e vetme për të monitoruar politikat e qeverive dhe të japë rekomandime.
Megjithatë, gjatë takimit u tha se përgjegjësitë fiskale dhe kontrolli fiskal janë të pandashme dhe u bë thirrje për një rol më të madh të Mekanizmit Europian të Stabilitetit për të vëzhguar rregullat e buxhetit të BE dhe Paktin për Rritje dhe Stabilitet.
Kompleksiteti i rregullave është shtuar dhe propozime janë bërë gjithashtu për prezantimin e një mekanizmi të ristrukturimit për borxhin sovran, që do të manaxhohet nga ESM, në mënyrë për të sjellë më shumë disiplinë në vendim-marrjen politike të qeverive.
Gjermania kërkon ta shohë Mekanizmin Europian të Stabilitetit të kthyer në një Fond Monetar Europian, një lëvizje që do të eliminonte nevojën e përfshirjes së fondit në Washington apo Bankës Qendrore Europiane në krizat e ardhshme, si ajo e shkaktuar nga Greqia, e përhapur më tej në Irlandë, Portugali, Spanjë dhe Qipro.
Bisedimet në Luksemburg janë pjesë e një diskutimi më të gjerë për 19 vendet e Eurozonës, mbi mënyrën se si të organizohet më mirë zona e valutës së përbashkët dhe integrimi i mëtejshëm pas daljes së Britanisë në vitin 2019.
Përveç transformimit të ESM, kishte ide të tjera për caktuar një buxhet për Eurozonën, një ministër financash të Eurozonës dhe një nëngrup për eurozonën në Parlamentin Europian.
Gjatë takimit, ministrat u ndanë me Wolfgang Schaeuble të Gjermanisë, kampionin e disiplinës buxhetore gjatë krizës, i cili po largohet pas 8 vitesh në detyrë, duke thënë se do të mungojë ekspertiza e tij.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.