Mjekët specialistë në rrethe – Rama: 2.5 milionë lekë shtesë në rrogë. Të mund të kenë një fitim real

Kryeministri Edi Rama, duke folur nga ceremonia e prezantimit të portalit të punësimit të infermierëve, ka zbuluar detaje në lidhje me projektin për mbulimin e nevojave të rretheve me mjekë specialistë.

Skema do të funksionojë me dhënien e një bonusi mbi pagën, ndërsa Rama deklaroi se kjo shtesë do të jetë deri në 2.5 milionë lekë të vjetra, një deklaratë që u prit me ovacione nga salla.

“2.5 milionë lekë të vjetra plus rrogës. Ju duken shumë, por është edhe më e madhe kostoja nga mungesa e tyre”, u shpreh Rama.

Sipas tij, bonusi maksimal prej 2.5 milionë lekësh do të ndahet shkallëzohet në varësi të specialiteteve.

“Për mjekët që do të shkojnë në Tropojë, Librazhd, etj. të mund të ketë një fitim real. Është një migrim i brendshëm, një fitim që nuk do ta kishte po të emigronte jashtë vendit”, u shpreh kryeministri.

Duke folur për nevojat reale të rretheve për mjekë specialistë, Rama u shpreh se ka më pak se 100 mungesa, një numër relativisht i vogël, por që krijon një boshllëk të madh në shërbimin shëndetësor.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.