Ndryshon kontrolli për 15 mijë biznese – Si do të ankimohen gjobat mbi 300 mijë lekë

Rreth 15 mijë biznese që deri më tani kontrolloheshin nga Inspektorati Shtetëror Shëndetësor, do të jenë në “varësi” të Autoritetit Kombëtar të Ushqimit, për të shmangur mbi-kontrollet.  Ndryshimet në ligjin për ushqimin janë botuar në Fletoren Zyrtare dhe hyjnë në fuqi më datë 23 Mars. Ligji  ndryshon metodën e kontrolleve ndaj subjekteve agroushqimore, duke i bërë ato në bazë risku.

Po ashtu, drafti  parashikon ngritjen e një Komisioni të Posaçëm pranë Ministrisë së Bujqësisë me 5 anëtarë, ky dy janë përfaqësues të AKU dhe tre të Ministrisë, për ankimimin e gjobave të vendosura ndaj bizneseve, kur vlera e përgjithshme e tyre në një inspektim të vetëm është mbi 300 mijë lekë. Kërkesë kjo e ardhura nga shoqatat e biznesit në sektorin agro-ushqimor.

Ndërsa gjobat me vlerë më të ulët marrin titull ekzekutiv. Në relacion thuhet se ky ligj ka për objektiv të sigurojë bazën për të garantuar që çdo hallkë e zinxhirit ushqimor të jetë shumë e fortë për të arritur synimin që shëndeti i konsumatorit të jetë plotësisht i mbrojtur. Ky objektiv është i vlefshëm pavarësisht nga fakti nëse ushqimet prodhohen në Shqipëri apo importohen nga vende të tjera.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.