Ngadalësohet ekonomia e Eurozonës – Norma më e ulët në 4 vite, rëndon tkurrja e Gjermanisë

Ekonomia e Eurozonës u rrit me normën më të ngadaltë në 4 vite gjatë tremujorit të tretë, ndërsa punësimi u ngadalësua gjithashtu gjatë periudhës, sipas të dhënave të Eurostat.

Agjencia e Statistikave e Bashkimit Europian, konfirmoi se Produkti i Brendshëm Bruto u rrit me 0.2% në periudhën Korrik-Shtator. Kjo ishte rritja më e ngadaltë ekonomike që prej tremujorit të dytë 2014.

Ekonomia e Gjermanisë, që është më e madhja në Europë, u tkurr me 0.2%, Franca u rrit me 0.4%, ndërsa Italia, e treta, nuk regjistroi rritje fare.

Eurostat konfirmoi gjithashtu se rritja e Produktit të Brendshëm Bruto  me bazë vjetore mbeti e pandryshuar në 1.7%,  norma më e ulët që prej tremujorit të katërt 2014.

Zyra e Statistikave publikoi edhe të dhënat për punësimin në Eurozonë. Rritja e punësimit u ngadalësua gjithashtu nga tremujori i dytë.

Numri i personave të punësuar në Eurozonë u rrit me 0.2% në tremujorin e tretë nga i dyti dhe me 1.3% me bazë vjetore.

Prodhimi industrial në Shtator, që është muaji i fundit i tremujorit, rezultoi gjithashtu i dobët, duke rënë me 0.3%. Prodhimi pati rënie në energji dhe mallrat e qëndrueshme të konsumit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.