Nuk ka dakordësi për postet e BE – Juncker: Nuk është e lehtë për të më zëvëndësuar mua

Liderët e Bashkimit Europian dështuan të arrijnë në një marrëveshje këtej javë për kandidatët e posteve kryesore në kontinent dhe lajmëruan se do të takohen përsëri më 30 Qershor.  Presidenti i Këshillit Donald Tusk, tha se nuk kishte një shumicë për asnjë kandidat dhe liderët do të takohen përsëri më 30 Qershor.  Ky ishte edhe takimi i parë në Bruskel pas zgjedhjeve parlamentare në muajin Maj. Disa liderë, përfshirë kryeministrin e Irlandës, thanë përpara takimit se do të jetë e vështirë të arrihet një marrëveshje për shkak të ndasive të mëdha për postet kryesore.

“Unë mendoj se nuk do të jemi në pozitë për të zgjedhur një president të ri të Komisionit dhe të Këshillit sot. Gjasat janë që do të zhvillohet një samit tjetër në fund të Qershorit apo fillim të Korrikut. Kjo nuk është e pazakontë në procesin politik europian. Do të kërkojë disa raunde,” u shpreh  Varadkar.

Ndërkohë, presidenti që po largohet, Jean-Claude Juncker, beri shaka duke thënë se nuk është e lehtë për ta zëvendësuar atë. “Me kënaqësi,  zbavitje, përmbushje e madje edhe me lumturi, po kuptoj që nuk është edhe aq e lehtë për të më zëvëndësuar mua,” tha ai.

Pasardhësi i presidentit të Komisionit Jean-Claude Juncker në krye të krahut ekzekutiv të Bashkimit Europian, është roli më i rëndësishëm në Bruksel. Të tjerë përfshijnë presidentin e Bankës Qendrore Europiane, presidentin e Këshillit Europian dhe shefin e politikave të jashtme të unionit.    Sipas rregullave të BE, vendet anëtare duhet të zgjedhin se kush do të drejtojë Komisionin dhe parlamenti europian duhet ta përforcojë atë zgjedhje.   Por, asambleja këmbëngul se vetëm kandidatët kryesor të partive në zgjedhjet e muajit Maj, janë të përshtatshëm për postin.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.