OECD ul riskun e Shqipërisë – Nuk ndodhte që prej 2004, bëhet më tërheqëse për investitorët e huaj
Organizata për Bashkëpunim Ekonomik dhe Zhvillim (OECD), ka përmirësuar notën e riskut të Shqipërisë, nga 6 që ishte më parë, në 5. Hera e fundit që Shqipëria ishte përmirësuar në nivelin e riskut nga OECD ka qenë viti i largët 2004. Vendi ynë rezulton të jetë kështu një ndër 4 vendet e vetme që janë përmirësuar, nga totali prej 201 shtetesh. Klasifikimi bëhet për vendet që janë pjesëmarrëse të marrëveshjes së vitit 1996 që shërben si garanci për investitorët. OECD shërben si garante e kësaj marrëveshje dhe për këtë arsye nxjerr edhe klasifikimin e riskut të këtyre shteteve. Vendet klasifikohen mbi bazën e 7 kategorive të riskut, ku sa më e lartë nota, aq më i lartë rreziku.
Praktikisht, një investitor i huaj i cili kërkon të vijë në Shqipëri, kërkon nga agjencitë e specializuara në këtë sektor që të dijë nivelin e riskut të vendit, dhe në bazë të këtij risku edhe polica e sigurimit të investimit varion, duke bërë që investitorët të kenë leverdi të shkojnë drejt vendeve më risk më të ulët, çka përkthehet veç të tjerash edhe në një policë sigurimi më të ulët për ta, pra investim më të vogël. Kjo do të thotë se, ulja e nivelit të riskut nga OECD mund të përkthehet në një afrim të investitorëve më huaj, duke qenë se Shqipëria ka një risk më të ulët dhe bëhet më tërheqëse për ta.
Në rajon, Shqipëria ka barazuar kështu Maqedoninë dhe Serbinë me nivelin e riskut në 5, ndërkohë që Mali i Zi, Kosova dhe Bosnje Hercegovina kanë nivelin më të lartë të mundshëm të riskut, në 7. Vendet e zhvilluara, përfshirë ato të Eurozonës dhe Bashkimit Europian nuk klasifikohen. Ndër vendet e klasifkuara, ato si Singapori, Hong Kongu apo Kuwaiti kanë nivelin më të ulët të riskut.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.