Pakësohen bizneset – Numri i tyre është në rënie për të tretin vit radhazi
Numri i bizneseve private jo-bujqësore në Shqipëri pësoi rënie për të tretin vit radhazi. Të dhënat nga Instituti i Statistikave treguan se për vitin 2018 numri i bizneseve, pa përfshirë fermerët, ishte rreth 122 mijë, 4 mijë më pak krahasuar me vitin 2017. Shumica e sektorëve ekonomikë kanë pësuar tkurrje të numrit të bizneseve, duke filluar nga tregtia dhe industria.
Në tregti, vitin e kaluar u mbyllën rreth dy mijë biznese, ndërsa numri i tyre është pakësuar me afërsisht pesë mijë njësi në harkun e tre viteve të fundit.
Në industri, vitin e kaluar u regjistruan afërsisht 900 biznese më pak, ndërsa tendenca në rënie vijoi edhe në sektorët e transportit dhe të hotelerisë e restoranteve. Rritje shënoi sektori i ndërtimit, me 100 firma më shumë krahasuar vitin 2017, si edhe segmenti i shërbimeve të tjera, ku numri i bizneseve u zgjerua me rreth 800 njësi.
Ndërkohë, edhe për vitin e kaluar ka vazhduar zgjerimi i formalizimit në bujqësi. Kjo ka bërë që numri i përgjithshëm i fermerëve të regjistruar të arrijë në afro 41 mijë, 5 mijë më shumë krahasuar me vitin 2017.
Procesi i formalizimit të fermerëve po jep disa rezultate, falë vendosjes së regjistrimit si kusht për aplikimin në skemat e subvencioneve. Gjithashtu, marrja e numrit të identitfikimit të subjektit mund të lidhet edhe me nevojën për të shitur dhe faturuar prodhimin në pikat e grumbullimit. Fakti që fermerët janë të përjashtuar nga pagesa e tatim-fitimit dhe tatimit mbi vlerën e shtuar e ka bërë më të lehtë këtë proces gradual të formalizimit të tyre. Jashtë sektorit bujqësor, duket se trysnia në rritje për formalizim dhe rimëkëmbja jo plotësisht e prekshme e ekonomisë mund të kenë ndikuar në uljen e numrit të bizneseve aktive.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.