Pandemia s’rrit sigurimin vullnetar të sëmundjeve – 7 mujori/ AMF: Vetëm 2% më shumë se viti i kaluar, rritja më e madhe te sigurimi i jetës
Pavarësisht situatës së pandemisë të shkaktuar nga COVID-19, sigurimi vullnetar i sëmundjeve mbetet një alternativë jo shumë e zgjedhur nga shqiptarët. Sipas të dhënave nga Autoriteti i Mbikëqyrjes Financiare, për periudhën janar-korrik të këtij viti në këtë zë është shënuar një rritje e lehtë prej 2%, në raport me të njëjtën periudhë të një vitit më parë, teksa primet arritën në 509.5 mln lekë.
Ndërkaq, rritja më e lartë duket se është te sigurimet e jetës, që sipas AMF-së u rritën me 36.01% gajtë 7-mujorit të këtij viti, në raport me të njëjtën periudhë të vitit të kaluar. Ndërkaq, sa i takon primeve të sigurimit vullnetar të Jo-Jetës për 7-mujorin patën rritje me 25.45%, në raport me 7-mujorine vitit të kaluar. Sipas AMF-së, në portofolët e Pronës, Përgjegjësive, Garancive të cilat gjatë periudhës janar-korrik 2021 siguruan mbi 2,2 mld lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 64.39%, të pasuara nga sigurimi i Përgjegjësisë së Përgjithshme me 26.61% të totalit.
Ndërkohë që, në portofolin sigurimi nga Zjarri dhe Forcat e Natyrës, gjatë periudhës janar-korrik 2021, vihet re një rritje prej 48.54% e volumit të primeve të shkruara bruto të këtij portofoli dhe një rritje me 10.08% e numrit të kontratave të sigurimit, krahasuar me periudhën janar-korrik 2020. Ndërkaq, tregu vazhdoi të mbetet sërish i orientuar tek sigurimet e Jo-Jetës, të cilat sollën 92.54 % të vëllimit të përgjithshëm të primeve, duke i lënë përkatësisht sigurimet e Jetës me 7.25%.
Grafik
SIGURIMI VULLNETAR I SËMUNDJEVE
7-mujori 2020 499 mln lekë
7-mujori 2021 509 mln lekë
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.