Pastrimi i parasë në Europë – Skandalet vënë në dukje mungesën e një “polici” të përbashkët
Këmbëngulja e Europës kundër një kontrolli të përbashkët të sistemit financiar, po shkakton probleme së fundmi.
Skandali i gjerë i pastrimit të parave ka ekspozuar dobësi që është shfrytëzuar prej kohësh nga kriminelët rusë, duke bërë që autoritetet amerikane të ndërhyjnë duke vënë gjoba të mëdha.
Në Europë, sistemet dhe rregullat e ndryshme kanë vështirësuar kontrollin e pastrimit të parasë, ndërkohë që nuk ka një agjenci qendrore të ngarkuar me hetimin e këtyre krimeve, që sipas disa vlerësimeve arrin në 2 trilionë dollarë në vit në të gjithë botën.
Ndërkohë që sistemi financiar nuk është rimëkëmbur ende nga krizat e dekadës së kaluar, politikëbërësit në kryeqytetet europiane duhet të arrijnë një ekuilibër mes ashpërsimit të rregullave për bankat dhe mbajtjen e tyre në përfitueshmëri.
Sipas analistëve, përbën një paradoks që ekziston vetëm 1 treg i përbashkët me liri të lëvizjes së kapitalit, por ka 28 sisteme të ndryshme të parandalimit të pastrimit të parasë.
Zbulimet e reja vënë në dukje madhësinë e aktivitetit të dyshimtë që ka përfshirë bankat në të gjithë kontinentin.
Bankat Nordike, nëpërmjet njësive të tyre në vendet Baltike, po kthehen në qendra për kriminelët rusë që kanalizojnë fondet drejt perëndimit.
Nordea bank, dyshohet se ka kaluar 700 milionë euro para të pista, sipas raportimeve këtë javë. Institucioni holandez ING u përfshi gjithashtu në skandalin e kësaj jave.
Shifrat, janë vetëm maja e ajsbergut për diçka që po kthehet në një kërcënim botëror. Fondi Monetar Ndërkombëtar ka vlerësuar se në të gjithë botën, thuajse 2 trilionë dollarë pastrohen çdo vit, vlerë që arrin përmasën e ekonomisë italiane.
Vende të vogla si Letonia kanë bërë thirrje për një autoritet të përbashkët europian që të gjurmojë dhe luftojë paranë e pistë.
Vende të mëdha si Gjermania, kanë bërë të ditur se janë skeptikë dhe se autoritetet kombëtare e bëjnë më mirë këtë punë.
Jose Manuel Campa, kreu i ardhshëm i Autoritetit Bankar Europian, tha se duhen bërë përpjekje për të përmirësuar koordinimin me kuadrin ekzistues, por shtoi se kjo nuk do të mjaftojë.
Sipas tij, sistemi aktual nuk mjafton për të luftuar pastrimin e parave.
“Europianët kanë pasur frikë të gjobisin bankat e mëdha për shkak të dëmit që mund t’i shkaktojnë, por bankat duhet të jenë në dijeni të pasojave dhe sjelljeve të jashtëligjshme”, tha ai.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.