Programi i Erdogan për ekonominë – Kërkon të fuqizojë kontrollin, do të shtojë influencën te politikat monetare
Presidenti i Turqisë, Recep Tayyip Erdogan, tha se synon të forcojë kontrollin ndaj ekonomisë dhe të ketë më shumë përgjegjshmëri për politikat monetare, nëse fiton zgjedhjet në muajin e ardhshëm. Ndërkohë që lira turke ka shënuar nivel rekord të ulët kundër dollarit dhe 17 valutave të tjera të mëdha, Erdogan tha se pasi votimi të transformojë Turqinë në një sistem të plotë presidencial, ai pret që banka qendrore t’i kushtojë vëmendje thirrjes për norma më të ulëta të interesit.
Norma bazë e interesit qëndron në 13.5%, ndërkohë që inflacioni arriti në 10.9% gjatë Marsit. “Kur njerëzit të kenë vështirësi prej politikave monetare, ata do të kërkojnë llogaridhënie ndaj presidentit. Për rrjedhojë, duhet të krijojmë imazhin e një presidenti që ka influencë ndaj politikave monetare”, tha Erdogan. Lira ra në nivelin më të ulët të të gjitha kohërave pas komenteve të tij, duke humbur rreth 1% në 4.4 kundër dollarit. Deri më tani për vitin, valuta ka rënë me 14%. Ish-guvernatori i bankës qendrore, Durmus Yilmaz tha se kërcënimi i ndërhyrjes politike në caktimin e normave të interesit do të dëmtojë ekonominë.
“Turqia provoi të njëjtën gjë në vitin 1994 dhe përfundoi në një krizë ku normat e interesit kaluan 400%-shin”, tha ai. Erdogan bëri thirrje muajin e kaluar për zgjedhje të parakohshme në 24 Qershor, ku fitorja pritet të konsolidojë qeverisjen e tij. Presidenti foli gjatë një takimi në Londër, me ekzekutivë, bankierë dhe investitorë në një kohë të rritjes së shqetësimeve mbi ekonominë e Turqisë. Gjatë takimit, ai do të bisedojë gjithashtu me Kryeministren dhe Mbretëreshën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.