Propozimi në Kuvend: Profesionin e avokatit në Shqipëri mund ta ushtrojnë dhe të huajt!

Nisma e re për ndryshimin e ligjit të avokatisë në Shqipëri u jep mundësinë edhe shtetasve të huaj që ta ushtrojnë këtë profesion në Shqipëri. Në projektligjin e depozituar në Kuvend parashikohet se “profesionin e avokatit në Republikën e Shqipërisë ka të drejë ta ushtrojë edhe çdo shtetas i huaj me kushtin që të zotërojë titullin avokat në një shtet anëtar të Bashkimit Europian dhe të ketë nënshkruar një kontratë bashkëpunimi me një studio avokatie në Republikën e Shqipërisë, e njohur dhe e regjistruar si e tillë në Dhomën e Avokatisë të Shqipërisë dhe në organet tatimore”.

Pesë vjet pasi kanë ushtruar veprimtarinë e tyre sipas kesaj pike, ata gëzojne të drejten e fitimit të titullit avokat rezident në Republiken e Shqipërisë. Po ashtu, projektligji parashikon dhe se Komiteti Drejtues i Dhomës së Avokatise të Shqipërisë njeh titullin avokat të fituar nga një person me shtetesi shqiptare ne një shtet të huaj, kryesisht anëtar të Bashkimit Europian, dhe mbi këtë bazë bën konvertimin me titullin e avokatit në Shqipëri.

Po ashtu, ligji parashikon edhe krijimin e Shkollës Kombëtare të Avokatisë dhe nga ana tjetër, krijon mundësinë e pezullimin të licencës së avokatit për periudha të caktuara kohore.

Kjo e fundit konsiderohet si risi pasi për herë të parë në draftin e ri të ligjit për avokatinë futet në ligj e drejta e pezullimit të ushtrimit të profesionit të avokatit, nëpërmjet mekanizmit të dorëheqjes.

Në ligjin e vjetër parashikohej pezullimi i ushtrimit të profesionit të avokatit, vetëm për shkak të papajtueshmërisë ligjore, dhe konkretisht kur personi ka qenë duke ushtruar profesione të tilla si, gjyqtar, prokuror, noter apo punojës i administratës publike.

Bashkë me dorëheqjen, drafti i ri parashikon edhe papajtueshmërinë e ushtrimit të profesionit të avokatit për shkak të marrëdhënieve të punës me subjektet private, ku përjashtim bëhet vetëm në rastin e një marëveshje midis avokatit dhe punëdhënësit privat. Kategorizimi i avokatëve në dy grupe të mëdha, në avokatë aktiv dhe pasiv, është një cilësim tjetër i rëndësishëm në ligjin e ri dhe që lidhet me detyrime ligjore në lidhje me ushtrimin e profesionit të avokatit për të dy këto kategori.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.