Pse janë kaq të larta faturat e gazit dhe sa është kufiri i çmimit të energjisë?
Familjarët në Britaninë e Madhe do të mësojnë këtë të enjte se sa pritet të rriten faturat e energjisë elektrike dhe gazit në vitin e ardhshëm. Rregullatori i energjisë do të shpallë kufirin e ri të çmimit të energjisë – shumën maksimale që furnizuesit mund të ngarkojnë në Britaninë e Madhe. Pritet të rritet ndjeshëm, sepse çmimet globale të gazit me shumicë janë rritur kaq shumë kohët e fundit.
Cili është kufiri i çmimit të energjisë?
Çdo gjashtë muaj, Ofgem, rregullatori i energjisë, rishikon çmimin maksimal që furnizuesit në Angli, Uells dhe Skoci mund t’i ngarkojnë klientët vendas me një tarifë standarde – ose të paracaktuar.
Ky quhet kufiri i çmimit të energjisë.
Rreth 15 milionë familje panë rritje të faturave të energjisë me 12% kur u përditësua për herë të fundit në tetor. Rishikimi tjetër do të shpallet të enjten më 3 shkurt dhe kufiri i ri do të hyjë në fuqi në prill. Parashikimet e industrisë sugjerojnë se çmimet e gazit mund të rriten deri në 50%.
Aktualisht, kufiri do të thotë që konsumatori tipik i gazit dhe energjisë elektrike paguan rreth 1277 paund në vit. Kufiri përcakton çmimet që furnizuesit mund të ngarkojnë për çdo njësi të energjisë, por kjo nuk do të thotë se ka një kufi për sa mund të paguajnë njerëzit. Sa më shumë gaz dhe energji elektrike të përdorni, aq më e lartë është fatura. Ekziston një treg i veçantë energjie në Irlandën e Veriut, me dy furnizues të gazit dhe çmimet janë rritur ndjeshëm gjithashtu për konsumatorët edhe atje.
Pse janë rritur çmimet?
Ka pasur një ‘shtrydhje’ në mbarë botën në furnizimet me gaz dhe energji gjatë vitit të kaluar. Si rezultat, çmimet e gazit me shumicë janë rritur në nivele të paprecedentë. Në fund të dhjetorit, ata arritën një rekord të ri prej 450 paund për termo, që ekspertët mendojnë se mund të çojë mesataren e faturave vjetore të gazit në rreth 2,000 paund vitin e ardhshëm.
Arsyet e rritjes përfshijnë:
- një dimër i ftohtë në Europë në 2020/21, i cili ushtroi presion mbi furnizimet dhe, si rezultat, nënkuptonte rënien e furnizimeve të depozituara të gazit;
- një verë relativisht pa erë do të thoshte se ishte e vështirë të plotësoheshin ato furnizime;
- rritja e kërkesës nga Azia – veçanërisht Kina – për gaz natyror të lëngshëm.
Ekzistojnë gjithashtu një sërë çështjesh teknike dhe gjeopolitike në lojë, që do të thotë se shumë vende në të gjithë Europën po përballen me të njëjtat probleme. Megjithatë, Britania e Madhe është goditur relativisht rëndë sepse është një nga përdoruesit më të mëdhenj të gazit natyror në Europë. Rreth 85% e shtëpive kanë ngrohje qendrore me gaz, dhe gjithashtu prodhon një të tretën e energjisë elektrike të vendit. Kapaciteti i ruajtjes në MB është gjithashtu më i ulët se në disa vende të tjera europiane. BBC
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.