Pse Këshilli i Europës anuloi dërgimin në Shqipëri të vëzhguesve për procesin e 30 qershorit? Artikulli i ‘Deutsche Welle’

Këshilli i Europës (KiE) ka anuluar në momentin e fundit, dërgimin në Shqipëri të delegacionit nga Kongresi i Autoriteteve Lokale, për vëzhgimin e zgjedhjeve lokale, që pritet të zhvillohen këtë të dielë më 30 qershor. ‘Deutsche Welle’ shkruan se ‘anulimi vjen një ditë pas deklaratës së Presidentit Meta se ‘ligjërisht nuk do të ketë zgjedhje më 30 qershor’.

“Zhvillimi i Lokaleve 2019  në Shqipëri, në prag të 30 qershorit, sa vjen dhe bëhet fakt real. Mazhoranca socialiste dhe partitë opoziatare parlamentare po vazhdojnë fushatën zgjedhore deri në ditën e heshtjes zgjedhore, 24 orë para ditës së zgjedhjeve. Ndërkohë, opozita jashtë sistemit politik, e kryesuar nga Partia Demokratike(PD) vijon të deklarojë e do të pamundësojë zhvillimin e zgjedhjeve. Një situatë e tillë sjell paqartësi dhe ngre pyetjen:  A do të ketë apo nuk do të ketë zgjedhje më 30 qershor? Pikërisht kësaj paqartësie dhe rreziqeve që mbart ajo i referohet KiE në vendimin e sapomarrë..” shkruhet në artikullin e DW.

Në njoftimin e tij zyrtar KiE bën me dije se ‘ka vendosur të mos dërgojë një delegacion të Kongresit të Autoriteteve Lokale të KiE, për vëzhgimin e zgjedhjeve lokaleve në Shqipëri për shkak të paqartësisë së vazhdueshme lidhur me organizimin e zgjedhjeve lokale në Shqipëri më 30 qershor si edhe rreziqet e mundshme të sigurisë në zona të caktuara ku do të mbahen zgjedhjet.”

Ndërkohë misioni i vëzhguesve ndërkombëtarë të OSBE/ODIHR-it, i ftuar nga qeveria e Tiranës, për vëzhgimin e procesit zgjedhor për Lokalet 2019,  më 30 qershor, vazhdon punën, i drejtuar nga Ambasadorja Audrey Glover.

Artikulli shoqërohet edhe më deklaratën e kreut të opozitës Lulzim Basha që e ka komentuar vendimin për tërheqjen e vëzhguesve si një “vendim politik i KiE për t’u distancuar nga votimet farsë”

Artikulli origjinal:      

https://www.dw.com/sq/shqip%C3%ABri-k%C3%ABshilli-i-evrop%C3%ABs-anullon-v%C3%ABzhgimin-e-lokaleve-2019/a-49365404

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.