Punësimi i studentëve – Korbi: Fakulteti ekonomik, 70% e të diplomuarve janë punësuar
Matësi më i mirë i universiteteve, i cilësisë dhe vlerës që ato kanë, është tregu i punës, aty ku studenti do të mund të “marrë mbrapsht” investimin e kryer gjatë viteve të studimit. Sipas zëvendësdekanit të Fakultetit Ekonomik, Alban Korbi, rreth 70% e studentëve të cilët diplomohen nga ky fakultet rezultojnë të punësuar. Në një intervistë për televizionin SCAN, zëvendësdekani shprehet se ky është rezultat i mundësive që ofron fakulteti përmes bashkëpunimit me biznese të ndryshme dhe angazhimit të studentëve përmes praktikave mësimore.
“Fakulteti përpiqet nëpërmjet lidhjeve me kompanitë private dhe me institucionet publike, me marrëveshjet që nënshkruajmë, duke filluar që me praktikat mësimore, të cilët studentëve që paraqiten një herë në praktikë iu jepet mundësia për punësim më tej, dhe nëpërmjet zyrës së karrierës organizojmë panaire me kompanitë e biznesit, me institucionet publike. Konkretisht në prill dhe maj kemi organizuar dy: një me 60 kompanitë më të mëdha të biznesit dhe një tjetër me institucionet publike, në bashkëpunim me DAP, për të rekrutuar studentë për praktikë dhe për punësim. Kemi një shifër mbi 70 për qind”, tha Korbi.
Më tej zëvendësdekani i Ekonomikut theksoi se ky fakultet ofron edhe mundësi për studentët përmes bursave ndërkombëtare, siç është programi Erasmus + për kualifikimin e studentëve jashtë vendit dhe shkëmbimin e eksperiencave .
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.