Puno një ditë më pak, me pagë të njëjtë – Revolucioni fillon nga Emilia Romagna
Puno një ditë më pak, me pagë të njëjtë. Propozimi i parë rajonal i ligjit vjen nga Emilia Romagna.
Piergiovanni Alleva, profesor në Universitetin e Bolonjës dhe Ankonës dhe anëtar në Këshillin Kombëtar të Ekonomisë ka propozuar idenë duke thënë se ajo synon të zvogëlojë numrin e të papunëve duke shpërndarë ngarkesën e punës në një numër më të madh të punëtorëve. Tashmë propozimi ka pasur mbështetjen e shumë partive dhe sidomos të Lëvizjes Pesë Yjet.
“Llogaritja e bërë është se për çdo katër punonjës që reduktojnë orarin mund të punësoni një person të ri”- shpjegon Alleva. Puna do të shkojë nga pesë në katër ditë në javë, por paga nuk do ndryshojë. Megjithatë, rezistenca kryesore e punëtorëve për një propozim të tillë është faktori ekonomik sepse deri tani ata që hoqën dorë nga disa orë pune, humbën gjithashtu edhe një pjesë të pagës së tyre. Për pjesën tjetër, mbi 53% deklarojnë se do të pranonin menjëherë.
“Nëse arrihet 100% e kompensimit të pagave dhe fuqia blerëse mbetet e njëjtë me një ditë shtesë të lirë, kjo kontratë do të pranohet nga të gjithë punëtorët” – thotë Alleva.
Në Rajonin e Emilia Romagna, propozimi u prit mirë nga shumica dhe jo vetëm. Për një përdorim më racional të burimeve, transferimet mund të përqendrohen vetëm për të papunët që i përkasin segmenteve të popullsisë jashtë tregut të punës, për shembull, mbi moshën 55 vjeç. Llogaritja që bën Alleva është kjo: “Për 40 mijë punëtorë që i përmbahen reduktimit të orarit të punës, duke lejuar rekrutimin e 10 mijë të rinjve, shpenzimi është 20.8 milion euro.”
Në vitet shtatëdhjetë, kur u prezantua shkurtimi i javës, vendet e punës u rritën për vetëm një vit.
E.T/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.
Artikujt e fundit
