Punonjësit e policisë, punësim edhe në administratë – Rastet kur bëhet transferimi, pozicionet sipas gradës
Punonjësit e policisë së shtetit mund të punësohen në administratën publike me grada të njëjta, nëse do të ketë nevoja për të përmbushur vende vakante. Qeveria ka miratuar vendimin për ekuivalentimin e gradave të Policisë së Shtetit me administratën publike në rastet e transferimit, rrjedhimisht edhe të pagave. Sipas ligjit në fuqi, institucioni në të cilin punonjësi i policisë transferohet është Ministria e Brendshme, institucionet në varësi të saj, si dhe organe apo institucione të tjera të administratës shtetërore, të cilat kanë në organikë funksione që mund të kryhen profesionalisht nga punonjës të Policisë së Shtetit.
Ligji përcakton se se gjatë kohës që punonjësi i policisë shërben si i transferuar në pozicione të ndryshme jashtë strukturës së Policisë së Shtetit, ai nuk gëzon atributet që lidhen me statusin e policies gjyqësore dhe as ato që lidhen me statusin e punonjësit të Policisë së Shtetit. Në rastet kur punonjësi i policisë transferohet në administratën publike, ai emërohet në funksione me nivel ekuivalent me gradën e tij policore.
Ndërkaq, sipas ligjislacioni, punonjësi i policisë, i transferuar, mund të rikthehet në detyrë brenda strukturave të Policisë së Shtetit sipas të njëjtave rregulla dhe procedura që ndiqen edhe në rastin e transferimit të tij jashtë strukturave të saj, në përputhje me kualifikimin profesional dhe gradën policore, Punonjësi i Policisë së Shtetit ka të drejtën e lëvizjes paralele dhe ngritjes në detyrë në pozicionet e administratës publike sipas parashikimeve të ligjit nr. 152/2013 “Për nëpunësin civil” pas ekuivalentimit të gradave policore me ato civile.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.