Qeveria tërhiqet nga bllokimi i llogarive! Ndryshon udhëzimi për llogaritë personale të administratorit e aksionarëve

Qeveria ka vendosur të tërhiqet nga udhëzimi që i jepte kompetencë të plotë administratës tatimore që të kontrollje dhe bllokojë llogaritë bankare të kompanive.

Kështu, Udhëzimin nr. 44, datë 09.11.2020, i cili ka si qëllim kryesor mbledhjen e detyrimeve të prapambetura, parashikon gjithashtu që “nëse pas zbatimit ndaj subjektit të të gjitha masave shtrënguese për mbledhjen me forcë të detyrimit (duke përfshirë edhe shitjen e pasurisë së sekuestruar), detyrimet tatimore të personit juridik nuk shlyhen plotësisht, administrata tatimore e transferon detyrimin tatimor të mbetur të subjektit tek ortaku, aksionari dhe administratori…”

Kjo pikë është kontestuar nga  22 dhoma tregtie e shoqata biznesi në vend, përmes një letre i drejtuar ministrisë së Financave dhe asaj të sipërmarrjes. Bizneset e kanë kanë konsideruar të papranueshëm cënimin e logarive personale të adminstratorit, ortakut dhe aksionarit të kompanisë lidhur me detyrimin tatimor të kompanisë pa patur një vendim të formës së prerë të Gjykatës i cili ngarkon me përgjegjësi individuale për pagesën e detyrimeve tatimore.

Ndërkaq, TV SCAN e ka ndjekur këtë çështje hap pas hapi, përmes kronikave dhe emisioneve të dedikuara, duke transmetuar shqetësimet e sipërmarrjes dhe efektet e këtij udhëzimi në klimën e biznesit. Ndërkohë, Unioni i Dhomave të Tregtisë ka bërë me dije së fundmi që ka marrë njoftimin se Ministria e Financave ka vendosur të modifikojë udhëzimin në fjalë, i cili ka krijuar përplasje mes palëve. Tashmë pritet të bëhen publike ndryshimet e reja.

Pika që kontestohet

“Nëse pas zbatimit ndaj subjektit të të gjitha masave shtrënguese për mbledhjen me forcë të detyrimit (duke përfshirë edhe shitjen e pasurisë së sekuestruar), detyrimet tatimore të personit juridik nuk shlyhen plotësisht, administrata tatimore e transferon detyrimin tatimor të mbetur të subjektit tek ortaku, aksionari dhe administrator”.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.