Qytetarët paguan 14.5 mld lekë taksa – Raporti/ 5.2 mld lekë vetëm nga taksa e pronës
Për vitin 2018, qytetarët shqiptarë kanë paguar 14.5 miliardë lekë taksa vendore, të cilat jo gjithnjë janë përkthyer në shërbime më cilësore.
Referuar raportit të financave vendore për vitin që lam pas, dy kanë qenë taksat kryesore që kanë dhënë kontributin maksimal në rritjen e të ardhurave nga bashkitë: taksa e ndikimit në infrastrukturë nga ndërtimet e reja dhe taksa mbi pasuritë e paluajtshme, që regjistruan 81.6 për qind të totalit të të ardhurave nga ky zë. Konkretisht, pesha e të ardhurave taksa e ndikimit në infrastrukturë është rritur me ritme të përshpejtuara, ndërsa pesha e të ardhurave nga taksa e pronës është tkurrur.
Po ashtu, është tkurrur dhe kontributi i tatimit të thjeshtuar mbi fitimin e biznesit të vogël dhe taksat e tjera. Për vitin 2018, të ardhurat nga taksa mbi pasuritë e paluhatshme arritën në 5.2 mld lekë, me rritje 10.6 për qind krahasuar me vitin 2017, ndërsa pritshmëritë këtë vit janë edhe të mëdha me zbatimin e metodologjisë së re të taksimit, e cila ka hyrë në fuqi më 1 janar 2019, që do të bëjë llogaritjen në bazën e vlerës së tregut.
Ndërsa nga të ardhurat nga taksa e ndikimit në infrastrukturë nga ndërtimet e reja u rritën me ritme dyshifrorë për të tretin vit radhazi, ku për 2018 të ardhurat nga kjo taksë u regjistruan në rreth 7.2 mld lekë. Duket se bashkitë kanë lëshuar ndjeshëm dorën në dhënien e lejeve të ndërtimit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.